ខេត្តបាត់ដំបង៖ បេីយោងតាមប្រភពព័ត៍មានពីស្នងការដ្ឋាននគរបាលខេត្តបាត់ដំបង បានឱ្យដឹងនៅព្រឹកថ្ងៃអង្គារទី២៤ ខែឧសភា ឆ្នាំ២០២២នេះថា៖ ជនជាប់ចោទម្នាក់ ត្រូវបានកម្លាំងជំនាញប្រឆាំងគ្រឿងញៀនខេត្ត ចាប់ឃាត់ខ្លួនតាមដីកាបង្គាប់ឱ្យចាប់ខ្លួនករណីគ្រឿងញៀននៅស្រុកគាស់ក្រឡ។
របាយការណ៍ដដែល បន្តថា ករណីឃាត់ខ្លួនជនសង្ស័យខាងលេីនេះ បានធ្វេីឡេីង កាលពីវេលាម៉ោង១២ និង៣០នាទីរសៀលថ្ងៃទី២៣ ខែឧសភាម្សិលមិញនេះ នៅចំណុចអណ្តូងកន្ទួត ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។
យោងតាមរបាយការណ៍របស់លោកវរសេនីយ៍ឯក សុខ និមល នាយការិយាល័យនគរបាលប្រឆាំងគ្រឿងញៀន បានឱ្យដឹងថា លោកដឹកនាំកម្លាំងក្នុងការិយាល័យសហការជាមួយ កម្លាំងក្រុមអន្តរាគមន៍ប្រឆាំងបទល្មើស នៃស្នងការដ្ឋាននគរបាលខេត្តបាត់ដំបង អនុវត្តដីកាបង្គាប់ឱ្យចាប់ខ្លួនលេខ ៩៦ត.ព្រ ចុះថ្ងៃទី១១ ខែកុម្ភៈ ឆ្នាំ២០២២ របស់លោក ឆ វីរៈ ចៅក្រមស៊ើបសួរ នៃសាលាដំបូងខេត្តបាត់ដំបងដោយបង្គាប់ឱ្យចាប់ខ្លួនឈ្មោះ យន់ ភារុណ ហៅ នួន ឬណុង ភេទប្រុស អាយុ៣១ឆ្នាំ មានទីលំនៅភូមិគោរកា ឃុំដូនបា ស្រុកគាស់ក្រឡ ខេត្តបាត់ដំបង ជាប់ចោទពីបទជួញដូរដោយខុសច្បាប់នូវសារធាតុញៀន ប្រព្រឹត្តនៅ ចំណុចអណ្តូងកន្ទួត ភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង កាលពីអំឡុងខែកក្កដា និងខែកញ្ញ ឆ្នាំ២០២១។
បច្ចុប្បន្នជនត្រូវចោទ កំពុងរៀបចំសំណុំរឿងបញ្ជូនទៅតុលាការដេីម្បីអនុវត្តតាមនីតិវិធី៕
ដោយ៖សហការី
