ខេត្តកំពង់ឆ្នាំង៖ ពលរដ្ឋនៅភូមិស្នោ ឃុំខុនរ៉ង រត់ផ្អើលពេញភូមិ បន្ទាប់ពីសត្វឆ្កែចចកព្រៃមួយក្បាល បានចេញពីក្នុងព្រៃមកដេញខាំ បង្ករឱ្យរងរបួសជាបន្តបន្ទាប់ ហេតុការណ៍ដ៍កម្រមួយនេះបានកើតឡើងកាលពីវេលាម៉ោង ម៉ោងប្រមាណ ម៉ោង៦ កាលពីព្រឹកថ្ងៃទី ២៤ ខែឧសភា ឆ្នាំ២០២២ នៅចំណុចភូមិស្នោ ឃុំខុនរ៉ង ស្រុកបរិបូណ៌ខេត្តកំពង់ ។
សមត្ថកិច្ចនគរបាលមូលដ្ឋានបានឲ្យដឹងថា នៅមុនពេលកើតហេតុមានប្រជាពលរដ្ឋនាំគ្នាទៅយកចង្រិតនៅតាមរណ្ដៅដាក់អំពូលយកចង្រិតដែលពួកគាត់បានដាក់ នៅចុងភូមិស្នោ ពេលនោះស្រាប់តែមានសត្វឆ្កែចចកព្រៃមួយក្បាលសម្បុរ ស.លឿង បានស្ទុះចេញពីព្រៃមកខាំប្រជាពលរដ្ឋជាច្រើននាក់ ព្រមទាំងរត់ចូលភូមិ ដេញខាំអ្នកស្រុកជាបន្តបន្ទាប់ បណ្ដាលឲ្យរងរបួស ប្រជាពលរដ្ឋ ពី ៦ទៅ ៧នាក់។
ប្រភពដដែលបានបន្តថា នៅក្នុងភូមិស្នោ ឃុំខុនរ៉ង មិនមែនជាភូមិមានព្រៃប៉ុន្មានទេ គ្រាន់តែជាព្រៃរបោះ និងគុម្ភឫស្សី នៅជាប់ជើងភូមិច្រើន តែប៉ុណ្ណោះ មិនដឹងថាចចកព្រៃមួយក្បាលនេះចេញពីកំហែងណាមកទេ ។ ចំពោះប្រជាពលរដ្ឋដែលរងរបួសបានទៅយកទៅព្យាបាលដោយខ្លួនឯងនៅ មន្ទីរពេទ្យអង្អែកស្រុកបរិបូរណ៍។សូមបញ្ជាក់ថាមិនមានអ្នករងរបួសធ្ងន់ក្នុងហេតុការណ៍ខាងលើនោះទេ ប៉ុន្តែអ្វីចម្លែកគឺជាលើកទីមួយហើយដែលមានចចកព្រៃចេញមកខាំប្រជាពលរដ្ឋបែបនេះ ។ ក្រោយពីដេញខំាប្រជាពលរដ្ឋឱ្យរងរបួសហើយ ត្រូវបានប្រជាពលរដ្ឋព័ទ្ធដេញវាយសត្វឆ្កែចចកនេះវិញតែម្តង ៕

ដោយ៖ចន្ថា