ភ្នំពេញ៖ បុរសម្នាក់ស្រវឹងស្រាជោកជាំបើករថយន្ដឡិចសីុសRX៣០០បញ្ច្រាស់ទិសចរាចរណ៍និងឆ្លងផ្លូវមិនប្រយ័ត្ននិងមិនគោរពច្បាប់ ត្រូវរថយន្ដឡិចសីុស៤៧០បុកចំពីមុខពេញទំហឹងបណ្ដាលឲ្យរងការខូចខាតទាំងសងខាង។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២និង៥០នាទីរំលងអាធ្រាត្រ ឈានចូលថ្ងៃទី០៤ ខែឧសភា ឆ្នាំ២០១៦ នៅចំណុចស្តុបវត្តនាគ្គវ័ន្ត តាមបណ្ដោយមហាវិថីសហព័ន្ធរុស្សី ស្ថិតក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ។
ព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេបានឃើញរថយន្ដម៉ាកឡិចសីុសRX៣០០ ពណ៌ស ពាក់ស្លាកលេខ ភ្នំពេញ2O-5613 បើកបរដោយបុរសម្នាក់ស្ថិតក្នុងស្ថានភាពស្រវឹងជោកធ្វើដំណើរតាមបណ្ដោយផ្លូវលេខ២២១ ដែលជាផ្លូវឯកទិស ក្នុងទិសដៅពីត្បូងទៅជើង(បញ្ច្រាស់ទិសចរាចរណ៍)ហើយបានឆ្លងមហាវិថីសហព័ន្ធរុស្សីទាំងស្ថានភាពស្រវឹងស្រាជោកជាំ និងមិនគោរពច្បាប់ចរាចរណ៍ ក៏ត្រូវរថយន្ដមួយគ្រឿងទៀតម៉ាក ឡិចសីុស៤៧០ ពណ៌ស ពាក់ស្លាកលេខ ភ្នំពេញ2AC-2115 ធ្វើដំណើរក្នងទិសដៅពីកើតមកលិចបុកចំក្បាលរថយន្ដពីចំហៀងខាងស្ដាំបណ្តាលអោយ រងការខូចខាតទាំងសងខាង។
ក្រោយពីកើតហេតុម្ចាស់រថយន្ដឡិចសីុRX៣០០បានទារសំណងខាងម្ចាស់រថយន្ដម្ខាងទៀតចំនួន7០០ដុល្លារទាំងខ្លួនស្រវឹងជោកតែម្ចាស់រថយន្ដម្ខាងទៀតមិនព្រមអោយ ក្រោយមកដោយភាគីទាំងពីរនិយាយមិនត្រូវគ្នា ទើបសមត្ថកិច្ចជំនាញបានចុះធ្វើការវាស់វែងយករថយន្ដទាំងពីរទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរងចាំដោះស្រាយនៅពេលក្រោយ៕
ដោយ៖ ព្រែកជ័យ
