ភ្នំពេញ​៖​ ក្នុងឱកាសប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៥ ឆ្នាំ២០២២ ក្រោមប្រធានបទ «TVET បង្កើនផលិតភាពការងារ និងភាពប្រកួតប្រជែងខ្ពស់» ក្រសួងបរិស្ថានបានចូលរួមជាមួយបណ្តាក្រសួង-ស្ថាប័នរដ្ឋ និងឯកជននៅរាជធានីភ្នំពេញ និងតាមបណ្តាខេត្តជាច្រើនទៀត បានរៀបចំជាស្តង់ដាក់បង្ហាញ ដើម្បីផ្តល់ និងផ្សព្វផ្សាយព័ត៌មានស្តីពីវិស័យបរិស្ថាន ដោយមានចែកជូនសៀវភៅកម្ពុជាមាតុភូមិខ្ញុំ សម្បត្តិធម្មជាតិ ទស្សនាវដ្តីបរិស្ថាន ឯកសារនានាពាក់ព័ន្ធនឹងវិស័យបរិស្ថាន ហើយក៏មានបញ្ចាំងវីដេអូអប់រំពីបរិស្ថាន ដល់សិស្ស និសិ្សត និងសាធារណជនទូទៅដែលបានចូលរួម។

ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៥ ឆ្នាំ២០២២ ដែលប្រារព្ធឡើងនៅមជ្ឍមណ្ឌលពិព័រណ៍ពាណិជ្ជកម្មកោះពេជ្រ នៅថ្ងៃទី១៥ ខែមិថុនា ឆ្នាំ២០២២នេះ រៀបចំឡើងដោយក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមសហការគាំទ្រពីក្រសួង-ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្តុះបណ្តាលសាធារណៈ ឯកជន អង្គការក្រៅរដ្ឋាភិបា និងដៃគូអភិវឌ្ឍន៍នានា។

នេះជាលើកទី៥ នៃការរៀបចំទិវាដ៏មហាឱឡោរិកនេះ បន្ទាប់ពីរាជរដ្ឋាភិបាលកម្ពុជា បានកំណត់យកថ្ងៃទី១៥ ខែមិថុនា រៀងរាល់ឆ្នាំ ជាទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ តាមអនុក្រឹតលេខ ១៥០ អនក្រ.បក ចុះថ្ងៃទី០៦ ខែកញ្ញា ឆ្នាំ២០១៧ ក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេសនិងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស យុវជន មាតាបិតា អាណាព្យាបាល និងផ្នែកឯកជនឱ្យបានយល់ដឹងអំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការជំរុញការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារក្នុងស្រុក និងក្រៅស្រុក។

គួរបញ្ជាក់ថា ស្តង់ពិព័រណ៍របស់ក្រសួងបរិស្ថាន ដែលមានអគ្គនាយកដ្ឋានចំណុះក្រសួងទាំង៥ចូលរួម បានដាក់តាំងបង្ហាញអំពីកិច្ចការងារគាំពារបរិស្ថាន ការអភិរក្សធនធានធម្មជាតិ ជីវៈចម្រុះ និងការអប់រំផ្សព្វផ្សាយបរិស្ថានផងដែរ៕

ដោយ​៖សហការី​