ភ្នំពេញ ៖ បុរសម្នាក់ស្រវឹងស្រា បានបើករថយន្តLexus RX330ធ្វើដំណើរក្នុងល្បឿនយ៉ាងលឿនហើយជ្រុលទៅបុករថយន្ត Toyota Prius កំពុងបត់ឆ្វេងឆ្លងផ្លូវពេញទំហឹងបណ្ដាលឲ្យបើងទៅម្ខាងផ្លូវរងការខូចខាតទាំងសងខាងយ៉ាងដំណំ សំណាងល្អដែរមិនមានអ្នករបួស។

       ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលវេលាម៉ោង១០ និង៣០នាទីយប់ថ្ងៃសៅរិ៍ ទី១៨ ខែមិថុនា ឆ្នាំ២០២២ ស្ថិតនៅតាមមហាវិថីចោមចៅ កែងនិងផ្លូវឌួងឌៀប ក្នុងសង្កាត់ស្ទឹងមានជ័យទី៣ ខណ្ឌមានជ័យ។

      តាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្ត Toyota Prius ពណ៌ប្រផេះ ពាក់ផ្លាកលេខភ្នំពេញ2BE -8431 ធ្វើដំណើរតាមមហាវិថីចោមចៅទិសដៅពីលិចទៅកើត ខណះមកដល់ចំណុចកើតហេតុខាងលើក៏បត់ឆ្វេងបានពាក់កណ្ដាលផ្លូវ ស្រាប់តែមានរថយន្តLexus RX330 ពណ៌ស ពាក់ផ្លាកលេខភ្នំពេញ2BD-1937បើកដោយបុរសម្នាក់ក្នុងស្ថានភាពស្រវឹងធ្វើដំណើរទិសដៅពីកើតទៅលិចក្នុងល្បឿនលឿនក៏បានជ្រុលទៅបុកចំទ្វារមុខខាងស្ដាំពេញទំហឹងបណ្ដាលឲ្យរថយន្តToyota Prius ប៉ើងទៅម្ខាងផ្លូវរងការខូចខាតទាំងសងខាងយ៉ាងដំណំ រីឯ​ រថយន្តLexus RX330ក៏ខូចខាតផ្នែកខាងមុខចំហៀងខាងឆ្វេងដូចគ្នា ។​

       ក្រោយកើតហេតុ សមត្ថកិច្ចជំនាញចរាចរណ៍ខណ្ឌមានជ័យ បានចុះមកចំណុចកើតហេតុបានឲ្យភាគីទាំងពីរសម្របសម្រួលគ្នា ដោយសម្រួសមិនត្រូវ ទើបសមត្ថកិច្ចទាក់ទងបន្តទៅសមត្ថកិច្ចជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការវាស់វែងយករថយន្តទាំងពីរគ្រឿងទៅរក្សាទុករងចាំដោះស្រាយនៅពេលក្រោយបន្តទៀត ៕ ដោយ ៖ ភារ៉ា ដង្កោ