ខេត្តកំពង់ឆ្នាំង៖ ឃុំចំនួន២របស់ ស្រុកកំពង់លែង បានទទួលរងនូវឥទ្ធិពលខ្យល់កន្រ្តាក់ កាលពីវេលាម៉ោងវេលាម៉ោង៧ និង ៣០នាទីយប់ ថ្ងៃទី៥ ខែឧសភា ឆ្នាំ២០១៦ បណ្តាលឲ្យផ្ទះប្រជាពលរដ្ឋចំនួន៥៦ខ្នងបាក់រាបដល់ដី និងរបើកដំបូល ។
មន្ត្រីសាលាស្រុកកំពង់លែងបានឲ្យដឹងថា ឃុំដែលទទួលរងនូវឥទ្ធិពលនៃខ្យល់កន្រ្តាក់នេះ មានឃុំដារដែលទទួលរងនូវផលប៉ះពាល់បណ្តាលឲ្យខូចខាតអស់ផ្ទះចំនួន៤៧ខ្នង ក្នុងនោះបាក់រលំដល់ដីចំនួន១៣ខ្នង និង ប៉ើងរបើកដំបូលចំនួន៣៤ខ្នង ។ ចំណែកឃុំសំរោងសែនប៉ះពាល់បណ្តាលឲ្យខូចខាតផ្ទះអស់ចំនួន៩ខ្នង ក្នុងនោះរលំបាក់រាបដល់ដីចំនួន១ខ្នង និងរបើកដំបូលចំនួន៨ខ្នង ។
មន្ត្រីសាលាស្រុកកំពង់លែងបានឲ្យដឹងទៀតថា ឥទ្ធិពលខ្យល់កន្រ្តាក់នេះបានកើតឡើងចាប់ពីវេលាម៉ោងប្រមាណជិត៧យប់ និងបោកបក់យ៉ាងខ្លាំងនៅវេលាម៉ោងប្រមាណជាង៧និង៣០នាទី បណ្តាលឲ្យខូចខាតទ្រព្យសម្បត្តិ ផ្ទះសំបែងប្រជាពលរដ្ឋស្ទើរទាំងស្រុង ។ ខ្យល់កន្រ្តាក់នេះមិនបណ្តាលឲ្យរងគ្រោះដល់ជីវិតមនុស្ស និងសត្វនោះទេ ដោយសារប្រជាពលរដ្ឋនៅពេលនោះឃើញស្ថានភាពខ្យល់បក់ខ្លាំងបាននាំគ្នាគេចចេញពីផ្ទះទៅរកទីដែលមានសុវត្ថិភាព ។
រហូតមកដល់ពេលនេះមន្ត្រីអាជ្ញាធរស្រុកបានចុះទៅពិនិត្យជាក់ស្តែង ឲ្យដឹងពីទំហំនៃកាកខូចខាត ៕
ដោយ៖ ចន្ថា
