ខេត្តស្វាយរៀង៖ លោក ណុប ចំរើន អភិបាលនៃគណៈអភិបាលក្រុងស្វាយរៀងបានអញ្ជើញជាអធិបតីក្នុងពិធីប្រកាសសុពលភាពសមាជិកក្រុមប្រឹក្សាសង្កាត់សង្កាត់ចេកអាណត្តិទី៥ នៃក្រុងស្វាយរៀង នាព្រឹកថ្ងៃទី៤ខែកក្កដាឆ្នាំ២០២២នៅសាលប្រជុំសង្កាត់ចេកក្រុងស្វាយរៀង។
ក្នុងឱកាសនោះក៏មានការអញ្ជើញចូលរួមពីលោក នាយករដ្ឋបាលសាលាក្រុងស្វាយរៀង លោកមេបញ្ជាការផ្នែកសឹករងក្រុងស្វាយរៀង លោកអធិការនគរបាលក្រុងស្វាយរៀង លោកមេបញ្ជាការមូលដ្ឋានកងរាជអាវុធហត្ថក្រុងស្វាយរៀង លោក ប្រធាន
អនុប្រធានការិយាល័យសាលាក្រុងស្វាយរៀង និងសមាជិក សមាជិកាចូលរួមមានលោក លោកស្រីសមាជិកក្រុមប្រឹក្សាសង្កាត់អាណត្តិចាស់ និងអាណត្តិថ្មី ស្មៀនសង្កាត់ ជំនួយការរដ្ឋបាលសង្កាត់ លោក ស្រីនាយិកាសាលាបឋមសិក្សាកន្ទុយវៃ លោកនាយកស្តីទីសាលាបឋមសិក្សាចេក គ្រូមត្តេយ្យសហគមន៍ភូមិចេក លោក ប្រធានមណ្ឌលសុខភាពចេក លោក លោកស្រីថ្នាក់ដឹកនាំភូមិទាំង១០ ក្នុងសង្កាត់
តំណាងគណបក្សនយោបាយ តំណាងគណៈកម្មាធិការ
និងគណៈកម្មការនានា តំណាងអង្គការសង្គមស៊ីវិល និងដៃគូអភិវឌ្ឍន៍ ចាស់ព្រឹទ្ធាចារ្យ និងប្រជាពលរដ្ឋជាច្រើននាក់ផងដែរ។
លោកអភិបាលក្រុងស្វាយរៀងក៏សូមថ្លែងនូវការកោតសរសើរ និងចូលរួមអបអរសាទរយ៉ាងក្លៀវក្លាចំពោះលោក លោកស្រី ជាសមាជិកក្រុមប្រឹក្សាសង្កាត់ អាណត្ដិទី៥ និង លោកស្រី ជាចៅសង្កាត់ចេក ចៅសង្កាត់រង ទំាងអស់ដែលបានទទួលនូវការស្រឡាញ់ពេញចិត្ដ និងការគំាទ្រពីសំណាក់ប្រជាពលរដ្ឋ តាមរយៈការបោះឆ្នោតកាលពីថ្ងៃអាទិត្យទី០៥ ខែមិថុនា ឆ្នាំ២០២២កន្លងមកនេះដើម្បីបន្តដឹកនាំ សង្កាត់ចេក ឱ្យបន្តអភិវឌ្ឍន៍រីកចម្រើនលើគ្រប់វិស័យជាបន្ថែមទៀត។
លោកបានបន្ថែមថាការបោះឆ្នោតជ្រើសរើសក្រុមប្រឹក្សានៅថ្នាក់ឃុំ សង្កាត់ គឺជាការជំរុញកិច្ចដំណើរការអនុវត្តកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ដែលកំណែទម្រង់នេះបានដើរតួនាទីយ៉ាងសំខាន់ក្នុងការលើកកម្ពស់អភិបាលកិច្ចនៅថ្នាក់ឃុំ សង្កាត់ តាមគោលការណ៍អភិវឌ្ឍតាមបែបប្រជាធិបតេយ្យនៅថ្នាក់មូលដ្ឋាន។
លោកបន្តថា អភិបាលកិច្ចល្អតម្រូវឱ្យក្រុមប្រឹក្សាឃុំ សង្កាត់ធ្វើជាតំណាងឱ្យផលប្រយោជន៍របស់ប្រជាពលរដ្ឋទាំងអស់នៅមូលដ្ឋាន ដូចនេះក្រុមប្រឹក្សាឃុំ សង្កាត់នីមួយៗ ត្រូវមានតួនាទី និងភារកិច្ចក្នុងការឆ្លើយតបនឹងតម្រូវការចាំបាច់របស់ប្រជាពលរដ្ឋនៅក្នុងមូលដ្ឋានរបស់ខ្លួនតាមរយៈការអភិវឌ្ឍ ការលើកកម្ពស់គុណភាពនៃជីវភាពរស់នៅតាមរយៈការផ្តល់សេវាសង្គម ការកសាង និងពង្រឹងពង្រីកហេដ្ឋារចនាសម្ព័ន្ធសាធាណៈដែលសំខាន់ចាំបាច់ឱ្យបានកាន់តែប្រសើរឡើង និងប្រកបដោយសមធម៌ បរិយាប័ន្ន និងមានចីរភាពដើម្បីឈានឆ្ពោះទៅរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ។
ក្នុងន័យនេះ ក្រុមប្រឹក្សាឃុំ សង្កាត់ដែលបានជាប់ឆ្នោតនៅក្នុងអាណត្តិទី៥នេះ ត្រូវបន្ដនិរន្ដរភាពនៃការដឹកនាំគ្រប់គ្រង និងអភិវឌ្ឍន៍នៅមូលដ្ឋានក្នុងអាណត្ដិ៥ឆ្នាំបន្ដទៀត។
នេះបានន័យថា ទោះបីជាក្រុមប្រឹក្សាសង្កាត់ ដែលប្រកាសទទួលស្គាល់នាឱកាសនេះ ជាក្រុមប្រឹក្សាសង្កាត់អាណត្ដិថ្មីក៏ពិតមែន ប៉ុន្ដែមិនមែនបានសេចក្ដីថាការងារគ្រប់គ្រង និងការងារអភិវឌ្ឍន៍មូលដ្ឋានដែលក្រុមប្រឹក្សាសង្កាត់អាណត្ដិចាស់បានអនុវត្ដកន្លងមកត្រូវបានបញ្ចប់នោះទេ ពោលគឺក្រុមប្រឹក្សាសង្កាត់ អាណត្ដិថ្មី ត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋានពីក្រុមប្រឹក្សាសង្កាត់ អាណត្ដិចាស់ សំដៅធានាឱ្យមាននិរន្ដរភាពក្នុងកិច្ចការរដ្ឋបាល និងការផ្ដល់សេវា ព្រមទំាងការអភិវឌ្ឍនៅមូលដ្ឋានជាបន្តទៀត៕
ដោយ៖ សុថាន
