ខេត្តសៀមរាប៖ ជនជាតិវៀតណាមចំនួន១១នាក់ ត្រូវបានកម្លាំងសមត្ថកិច្ចចម្រុះរួមមាន រដ្ឋបាលជលផល និងអាវុធហត្ថ ចាប់ឃាត់ខ្លួនបញ្ជូនមកកាន់តុលាការខេត្ដសៀមរាប ខណៈដែលពួកគេ ធ្វើបទល្មើសនេសាទខុសច្បាប់ នៅរដូវហាមឃាត់ ក្នុងបឹងទន្លេសាប។
ហេតុការណ៍ចុះបង្ក្រាបនេះធ្វើឡើងនៅវេលាម៉ោង១៣រសៀលថ្ងៃទី២៣ខែកក្កដា ឆ្នាំ២០១៥ នៅចំណុចភូមិសាស្រ្តជួរចក្រីឃុំអន្លង់សំណរស្រុកជីក្រែងខេត្តសៀមរាប។
មន្ត្រីអាវុធហត្ថខេត្តឲ្យដឹងថា ជនជាតិវៀតណាមទាំង១១នាក់នេះត្រូវបានដឹកបញ្ជូនមកកាន់តុលាការខេត្តដើម្បីចាត់ការទៅតាមផ្លូវច្បាប់។ មន្ត្រីដដែលបន្តថា នេះជាការបង្ក្រាបបទល្មើសនេសាទនារដូវត្រីពងកូននិងជារដូវហាមឃាត់ការនេសាទខុសច្បាប់ដែលមានទ្រង់ទ្រាយធំហើយទទួលបានផ្លែផ្កាគួរជាទីមោទនះ។លោកយឹម ស៊ីវ័ននាយសង្កាត់រដ្ឋបាលជលផលអន្លង់សំណរបានមានប្រសាសន៍ឲ្យដឹងថាកម្លាំងសមត្ថកិច្ចចម្រុះចាប់បានជនជាតិវៀតណាមចំនួន១១នាក់ព្រមទាំងដកហូតយកវត្ថុតាងល្មើសច្បាប់មួយចំនួនដូចជាទូក៩គ្រឿងឧបករណ៍នេសាទល្មើសច្បាប់មួយចំនួនទៀត។
លោកបន្តថាការបង្ក្រាបនេះមានការសហការពីថ្នាក់ក្រសួងនិងថ្នាក់ខេត្ត។គួរកត់សម្គាល់ផងដែរថាទាល់តែមានការចាក់គូថពីសំណាក់សមត្ថកិច្ចក្រសួងទើបគេឃើញម្នាក់ៗនាំគ្នាចូលរួមបង្ក្រាបតែបើមិនមាននរណាចាក់គូថនោះទេប្រាកដជាចាំតែហៃអើ ហើយ៕ជានិរន្ដរ៍
