ខេត្តកោះកុង៖ លោកវរសេនីយ៍ឯក ឆឹង វាសនា ស្នងការរងទទួលផែនការងារនគរបាលព្រហ្មទណ្ឌកម្រិតធ្ងន់ នៅរសៀលថ្ងៃទី១២ ខែកក្កដា ឆ្នាំ២០២២ វេលាម៉ោង១៤និង៥០នាទី បានដឹកនាំកម្លាំងជំនាញផ្នែកអនុវត្តដីកា សហការជាមួយកម្លាំងជំនាញអធិការដ្ឋាននគរបាលក្រុងខេមរភូមិន្ទ បានចុះអនុវត្តតាមដីកាបង្គាប់ឲ្យចាប់ខ្លួនលេខ៧១៣ ច.ខ ចុះថ្ងៃទី១២ខែវិច្ឆិកាឆ្នាំ២០១៣ចេញដោយលោក ថាន់ ឡេង ចៅក្រមស៊ើបសួរនៃសាលាដំបូងខេត្តកំពង់ចាម ចាប់ឃាត់ខ្លួនឈ្មោះ កាំង វុទ្ធី ភេទប្រុស អាយុ៣១ឆ្នាំ ជនជាតិខ្មែរ ទីលំនៅសព្វថ្ងៃភូមិសន្ទៃ ឃុំព្រែកពោធិ ស្រុកស្រីសន្ធរ ខេត្តកំពង់ចាម ពីបទ មនុស្សឃាតដោយចេតនា ប្រព្រឹត្តនៅភូមិស្វាយស្រណោះ ឃុំរកាអារ ស្រុកកងមាស ខេត្តកំពង់ចាមកាលពីថ្ងៃទី៣ ខែឧសភា ឆ្នាំឆ្នាំ២០១២ ។
លោកវរសេនីយ៍ឯក ឆឹង វាសនា បានអោយដឹងថា សមត្ថកិច្ចបានឃាត់ខ្លួនជនត្រូវចោទនៅចំណុចភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង ។
បច្ចុប្បន្ន ជនត្រូវចោទត្រូវបានឃាត់ខ្លួនបណ្តោះអាសន្ននៅផែនការងារនគរបាលព្រហ្មទណ្ឌ រង់ចាំកម្លាំងជំនាញនគរបាលព្រហ្មទណ្ឌខេត្តកំពង់ចាម ដើម្បីមកធ្វើកំណត់ហេតុប្រគល់-ទទួលយកទៅខេត្តកំពង់ចាមចាត់ការតាមនីតិវិធី ៕អរុណរះ
