ភ្នំពេញ៖ ជនសង្ស័យបីនាក់បានជិះម៉ូតូពីរគ្រឿងធ្វេីសកម្មភាពឆក់យកខ្សែកពីបុរសម្នាក់ខណៈដែលគាត់អង្គុយលេីម៉ូតូចាំប្រពន្ធចូលផ្សារបានសម្រេចហេីយព្យាយាមគេចខ្លួន តែត្រូវជនរងគ្រោះស្រែកឆោឡោឡេីងធ្វើឱ្យផ្អេីលដល់ប្រជាពលរដ្ឋនៅក្បែរនោះនាំគ្នាដេញចាប់ឃាត់បានម្នាក់ភ្លាមៗ ចំណែកពីរនាក់ទៀតយកខ្សែកជិះម៉ូតូគេចខ្លួនបាត់ទៅ។
ហេតុការណ៍នេះបានកេីតឡេីងកាលពីវេលាម៉ោង៩និង៣០នាទីព្រឹកថ្ងៃទី១៧ ខែកក្កដា ឆ្នាំ២០២២ នៅចំណុចផ្លូវបេតុង ក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ។
ជនសង្ស័យឈ្មោះស្រេង បាលី ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅភូមិរោងចក្រ សង្កាត់ភ្នំពេញថ្មី ខណ្ឌសែនសុខ។ ម៉ូតូដែលជនសង្ស័យជិះធ្វេីសកម្មភាពម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ1JF-9323។
ចំណែកជនរងគ្រោះឈ្មោះហេង ផល្លី ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់បន្ទប់ជួលក្នុងសង្កាត់កាកាបទី២ ខណ្ឌពោធិ៍សែនជ័យ។
តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះបានជិះម៉ូតូដឹកប្រពន្ធមករកទិញអីវ៉ាន់នៅក្នុងផ្សារកណ្តាល ហើយខណៈប្រពន្ធចូលផ្សារបាត់ទៅបុរសជាប្តីក៏អង្គុយលេីម៉ូតូនៅចិញ្ចេីមផ្លូវដេីម្បីរង់ចាំប្រពន្ធចេញមកវិញ ។ លុះមួយសន្ទុះក្រោយមកស្រាប់តែមានជនសង្ស័យចំនួន៣នាក់ជិះម៉ូតូហុងដាឌ្រីមចំនួន២គ្រឿងមកអែបជនរងគ្រោះ ហើយរំពេចនោះជនសង្ស័យពីរនាក់បានធ្វេីសកម្មភាពឆក់យកខ្សែកពីជនរងគ្រោះចំណែកម្នាក់ទៀតចាំបើកម៉ូតូបិទគូទពីក្រោយ។ ពេលឆក់បានសម្រេចហេីយជនសង្ស័យនាំគ្នាជិះម៉ូតូគេចខ្លួន តែភ្លាមៗនោះជនរងគ្រោះបានស្រែកថាចោរៗធ្វើឱ្យផ្អេីលដល់ប្រជាពលរដ្ឋដែលនៅក្បែរនោះនាំគ្នាដេញចាប់បានប្រហែលជាង១០០
ម៉ែត្រទេីបឃាត់ខ្លួនជនសង្ស័យបានម្នាក់ ចំណែកពីរនាក់ទៀតដែលឆក់យកខ្សែកជនរងគ្រោះបានគេចខ្លួនបាត់យកទាំងខ្សែកទៅផងដែរ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការតាមច្បាប់៕
ដោយ៖សុខាសែនជ័យ
