ខេត្តក្រចេះ៖ បុរសជាប្តីចិត្តកំណាចវ័យ៤៥ឆ្នាំ និងជាជនប្រមឹកខួបគឺត្រូវនគរបាលស្រុកស្នួល ចាប់ឃាត់ខ្លួនភ្លាមៗ ក្រោយពីជនម្នាក់នេះ បានផឹកស្រាស្រវឹងហើយបានធ្វើសកម្មភាពវាយធ្វើបាបប្រពន្ធនិងស៊ុមរូបថតរហូតដល់ស្លាប់ ហើយត្រូវបាននគរបាលសាកសួរ រួចបញ្ជូនខ្លួនមកការិយាល័យព្រហ្មទណ្ឌកំរិតធ្ងន់ខេត្តក្រចេះ នៅរសៀលថ្ងៃទី៩ខែឧសភាឆ្នាំ២០១៦នេះ ។
នគរបាលស្រុកស្នួលបានឱ្យដឹងថា ជនប្រមឹកខួបដែលបានវាយធ្វើបាបប្រពន្ធខ្លួនឯងរហូតដល់ស្លាប់ម្នាក់នេះ ឈ្មោះ ហ៊ឹន ណាន អាយុ៤៥ឆ្នាំ រស់នៅភូមិវត្តស្នួលកើត ឃុំស្នួល ស្រុកស្នួល ខេត្តក្រចេះ ហើយត្រូវបាននគរបាលចាប់ឃាត់ខ្លួន កាលពីព្រឹកថ្ងៃទី៨ខែឧសភា ក្រោយពីបានទទួលពាក្យបណ្តឹងរួចមក ។
អធិការនគរបាលស្រុកស្នួល លោកវរៈសេនីយ៍ទោ ចាន់ សុខគីម បានឱ្យដឹងថា កាលពីល្ងាចថ្ងៃទី៦ខែឧសភា ស្ត្រីជាជនរងគ្រោះ ឈ្មោះ អ៊ីន ស៊ួ អាយុ៥១ឆ្នាំ ជាមួយប្តី រួមនិងអ្នកជិតខាងម្នាក់ទៀត បានផឹកស៊ីជុំគ្នានៅលើផ្ទះរបស់ខ្លួន រហូតដល់ម៉ោង៨យប់ថ្ងៃដដែរ លុះផឹកស្រាសរអស់ជិត១លីត្រ អ្នកជិតខាងក៏ត្រឡប់ទៅផ្ទះវិញ ។
លោកអធិការបន្តថា ក្រោយពីអ្នកជិតខាងបានត្រឡប់ទៅផ្ទះហើយនោះ បុរសជាប្តីរួមនិងស្រ្តីជាប្រពន្ធ ដោយក្នុងស្ថានភាពស្រវឹងរៀងខ្លួន ហើយក៏បានឈ្លោះប្រកែកគ្នា ភ្លាមនោះស្រ្តីរងគ្រោះជាប្រពន្ធក៏បានដេញបុរសជាប្តីចេញពីផ្ទះ ខណៈនោះបុរសជាប្តីក៏បានទាញស៊ុមរូបថតវាយមកលើប្រពន្ធ រួចបុរសជាប្តីបានឡើងទៅដេកនៅលើផ្ទះបាត់ ។
លោកបានបញ្ជាក់ថា លុះនៅព្រឹកថ្ងៃទី៧ខែឧសភា ពេលបុរសជាប្តីក្រោកពីដេក ស្ត្រីរងគ្រោះជាប្រពន្ធ បានរករឿងជេរ និងបានវិចបង្វេចខោអាវ ហើយដេញឱ្យប្តីចុះចេញពីផ្ទះ ខណៈនោះស្រាប់តែប្តីនោះបានទាញស៊ុមរូបថតវាយមកលើប្រពន្ធរបស់ខ្លួនម្តងទៀត បណ្តាលឱ្យត្រូវចំក្បាល ដងខ្លួនរបួសជាច្រើនកន្លែង ។
លោកថា ស្ត្រីរងគ្រោះក្រោយពីប្តីវាយធ្វើបាប បានគេចទៅដេកនៅផ្ទះប្អូន រហូតដល់ព្រឹកថ្ងៃទី៨ខែឧសភា ដោយសារអាការៈធ្ងន់ធ្ងរពេក ស្ត្រីរងគ្រោះបានដេកស្លាប់តែម្តង ។ លោកថា បើតាមការពិនិត្យរបស់សមត្ថកិច្ចជំនាញ សាកសពស្ត្រីរងគ្រោះឈ្មោះ អ៊ីន ស៊ួ អាយុ៥១ឆ្នាំ គឺមានស្លាកស្នាមរបួសជាំ ស្ទើរពេញរាងកាយដោយសារតែការវាយដុំពីបុរសជាប្តី ។
លោកវរៈសេនីយ៍ទោ ហួត លឹមហ៊ាង នាយការិយាល័យព្រហ្មទណ្ឌកំរិតធ្ងន់ខេត្ត បាននិយាយថា ជននេះនិងត្រូវបញ្ជូនខ្លួនទៅសាលាដំបូងខេត្តក្រចេះ នៅព្រឹកថ្ងៃទី១០ខែឧសភា ក្រោយពីបញ្ចប់ការសាកសួរតាមនីតិវិធីរបស់មន្ត្រីជំនាញរួច ៕
ដោយ៖ កោះទ្រុង
