ភ្នំពេញៈ សមត្ថកិច្ចនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី៩ ខែឧសភា ឆ្នាំ២០១៦ បញ្ចូនខ្លួននាយរងនគរបាលប៉ុស្តិ៍បឹងទំពុនម្នាក់ និង មន្ត្រីផ្នែកសណ្តាប់ធ្នាប់ចរាចរណ៍ នគរបាលខណ្ឌមានជ័យម្នាក់ទៀត មកអយ្យការអមសាលាដំបូងរាជធានីភ្នំពេញ ដើម្បីសាកសួរករណីក្លែងត្រាធ្វើសៀវភៅ ស្នាក់នៅឲ្យប្រជាពលរដ្ឋក្នុងតម្លៃ៨០ដុល្លារ ។
ទោះបីយ៉ាងណា រសៀលមកទល់ល្ងាចថ្ងៃដដែល លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ពុំទាន់សម្រេចយ៉ាងណានៅឡើយទេ ។
សមត្ថកិច្ច បានឲ្យដឹងថា នាយរងនគរបាលប៉ុស្តិ៍បឹងទំពុនឈ្មោះ កែវ សារ៉ាវុធ និង មន្ត្រីផ្នែកសណ្តាប់ធ្នាប់ចរាចរណ៍ នគរបាលខណ្ឌមានជ័យ ឈ្មោះ សួន សុវណ្ណ បានត្រូវសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនកាលពីថ្ងៃទី៧ ខែឧសភា ឆ្នាំ២០១៦ ។ ជុំវិញករណីនេះនាយឧត្តមសេនីយ៍ នេត សាវឿនក៏បានថ្លែងថាៈ មន្រ្តីនគរបាល ដែល ក្លែងឯកសារខុសច្បាប់ ត្រូវបកសក្តិ និងបញ្ជូនទៅតុលាការអគ្គស្នងការនគរបាលជាតិ នាយឧត្តមសេនីយ៍ នេត សាវឿន បានប្រកាសចាត់វិធានការចំពោះ មន្រ្តីនគរបាលរូបណាដែលហ៊ានក្លែងឯកសារខុសច្បាប់ដូចជា សៀវភៅគ្រួសារ សៀវភៅស្នាក់ និងអត្តសញ្ញាណប័ណ្ណ ។ល។ ត្រូវទទួលទោសតាមច្បាប់ ដោយមិនមានការលើកលែងឡើយ។
នៅក្នុងកិច្ចប្រជុំផ្សព្វផ្សាយសេចក្តីណែនាំលេខ ០០៩សណន របស់ក្រសួងមហាផ្ទៃ ស្តីពីវិធានការគ្រប់គ្រង និងបែងចែកប្រាក់ចំណូលពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកថ្មី នាព្រឹកថ្ងៃទី៩ ខែឧសភា ឆ្នាំ២០១៦ នៅអគ្គស្នងការដ្ឋាននគរបាលជាតិ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានថ្លែងថា “នៅរាជធានីភ្នំពេញប៉ុន្មានថ្ងៃកន្លងទៅនេះ មានអនុប្រធានប៉ុស្តិ៍មួយរូប នៅខណ្ឌមានជ័យ បានទៅធ្វើត្រាមូល និងត្រាឈ្មោះអធិការក្លែងក្លាយ ទៅធ្វើសៀវភៅគ្រួសារ យកលុយ ៨០ដុល្លារ ។ ការហ៊ានធ្វើក្លែងក្លាយបែបនេះគឺជា បទល្មើសពេញទី ដូច្នេះត្រូវបញ្ជូនទៅតុលាការ គ្មានការយោគយល់អ្វីនោះទេ” ។
នាយឧត្តមសេនីយ៍ នេត សាវឿន បានបញ្ជាក់ថាវាជាបញ្ហាធ្ងន់ធ្ងរ បើនគរបាលចូលរួមជាមួយក្រុមចោរ ចូលរួមលក់គ្រឿងញៀន ដូច្នេះមិនមានការអប់រំអ្វីទេ គឺមានតែបញ្ជូនទៅតុលាការដាក់គុកតែម្តង ។
ក្នុងឱកាសនោះ នាយឧត្តមសេនីយ៍ នេត សាវឿន បានបញ្ជាឲ្យស្នងការរាជធានី ខេត្តទាំង ២៥ រួមទាំងកម្លាំងថ្នាក់ជាតិទាំងអស់ ត្រូវខិតខំប្រឹងប្រែងរក្សាសន្តិសុខ សណ្តាប់ធ្នាប់ ជំរុញការរក្សាសន្តិសុខជាតិ បទល្មើសគ្រប់ប្រភេទ ទាំងបទល្មើសព្រហ្មទណ្ឌ បទល្មើសជួញដូរ បទល្មើសគ្រឿញៀន និងរក្សាសណ្តាប់ធ្នាប់ទូទៅ។ លោក បញ្ជាក់ថា គ្រប់ការងារបទល្មើស និងការងារចរាចរណ៍ផ្លូវគោក ស្នងការរាជធានី ខេត្ត ត្រូវទទួលខុសត្រូវចំពោះមុខ ក្រសួងមហាផ្ទៃ និងអគ្គស្នងការនគរបាលជាតិ ៕
ដោយ សីលា
