ភ្នំពេញ៖ អាជ្ញាធររាជធានី និងគណៈកម្មការអន្តរក្រសួងបានបើកកិច្ចប្រជុំពិភាក្សាជាថ្មីម្តងទៀត ស្ដីអំពី ការសើរើបញ្ជីសារពើភ័ណ្ឌ ដើម្បីជម្រុញការផ្តល់កម្មសិទ្ធិជូនប្រជាពលរដ្ឋ ដែលរស់លើដីឯកជនរបស់រដ្ឋ ក្នុងរាជធានីភ្នំពេញឲ្យបានមុន ឆ្នាំ២០១៧ ក្នុងគោលបំណង បញ្ចប់បញ្ហារឿងទំនាសដីធ្លី ដែលជាជំងឺដ៏រាំរ៉ៃ បានអូសបន្លាយជាយូរយ៉ាណាស់មកហើយនោះ និងបញ្ហាមួយទៀតនោះគឺ ដើម្បីជម្រុញលឿន ការងារនេះឲ្យបានមុនពេលបោះ ឆ្នោត ឃុំ-សង្កាត់ឆ្នាំ២០១៧ខាងមុខនេះដែរ ។
កិច្ចប្រជុំនេះបានប្រព្រឹត្ដទៅកាលពីរសៀលថ្ងៃទី១០ ឧសភា ឆ្នាំ២០១៦ នៅសាលារាជធានីភ្នំពេញ ដោយមានការចូលរួមពីលោក ប៉ា សុជាតិវង្ស អភិបាលរាជធានីភ្នំពេញ និងមន្ដ្រីមកពីបណ្ដាក្រសួងពាក់ព័ន្ធផងដែរ ។
លោក ប៉ា សុជាតិវង្ស ក្នុងកិច្ចប្រជុំនោះបានលើកឡើងថា ៖ ការងារខាងលើនេះយើងធ្លាប់និងបានអនុវត្តតាំងពីឆ្នាំ២០០៤មកម្លេះ ប៉ុន្តែក្នុងរយៈពេលជាង១០ឆ្នាំមកនេះ មិនទាន់ដោះស្រាយបញ្ចប់នូវឡើយទេ ដោយហេតុនេះហើយទើបរាជរដ្ឋាភិបាលបានបង្កើតគណៈ កម្ម ការអន្តរក្រសួងនេះឡើង ក្នុងគោលបំណងជម្រុញការងារនេះឲ្យបានលឿន និងត្រឹមត្រូវ ។
ការបង្កើតគណៈកម្មការនេះឡើងគឺដើម្បីធ្វើការរួមគ្នាបើកតំបន់វិនិច្ឆ័យចុះបញ្ជីដីធ្លីជាលក្ខណៈប្រព័ន្ធជូនប្រជាពលរដ្ឋ ដែលកំពុងរស់នៅតាមសហគមន៍បណ្តោះអាសន្ន លើដីឯកជនរបស់រដ្ឋក្នុងរាជធានីភ្នំពេញឲ្យបានលឿនជូនពលរដ្ឋ។
គណៈកម្មការអន្តរក្រសួងនេះ ត្រូវបានតែងតាំងសមាសភាពចំនួន១៦រូប ក្នុងនោះរួមមានលោក ប៉ា សុជាតិវង្ស អភិបាលរាជធានីភ្នំពេញ ជាប្រធាន និងរដ្ឋលេខាធិការនៅតាមបណ្ដាក្រសួងពាក់ព័ន្ធមួយចំនួនទៀតជាសមាជិក។
លោកប៉ា សុជាតិវង្ស បានបន្តថា ៖ សម្រាប់អាជ្ញាធររាជធានីមិនអាចគ្រប់គ្រងបានទាំងស្រុងនោះទេលើស្ថិតិប្រជាពលរដ្ឋដែលរស់លើដីឯកជនរបស់រដ្ឋនេះ ដែលដាច់ខាតត្រូវតែមានការចូលរួមពីក្រសួងស្ថាប័នទាំងអស់ ហើយក្នុងកិច្ចប្រជុំនេះធ្វើឡើងដើម្បីឲ្យក្រសួង ស្ថាប័នទាំងអស់ស្រង់ស្ថិតិ ប្រជាពលរដ្ឋទាំងនេះឲ្យបានច្បាស់លាស់ ហើយយកមកដាក់លើតុជជែកពិភាក្សាគ្នា មុននឹងដាក់ចូលទៅឲ្យប្រមុខរាជរដ្ឋាភិបាលសម្រេចចុងក្រោយ។ ប៉ុន្តែទោះបីជាយ៉ាងណាក្តីលោក ប៉ា សុជាតិវង្ស ក៏បានបញ្ជាក់ថា ត្រូវតែជម្រុញការងារនេះឲ្យបានបញ្ចប់នៅមុនពេលបោះឆ្នោតឃុំ-សង្កាត់ឆ្នាំ២០១៧ខាងមុខនេះ ។
សូមបញ្ជាក់ថា៖ ការសេចក្តីសម្រេចរបស់រាជរដ្ឋាភិបាលកម្ពុជាបានបញ្ជាក់ថា៖ គណៈកម្មការអន្តរក្រសួងនេះ មានភារកិច្ចពិនិត្យទីតាំងប្រជាពលរដ្ឋរស់នៅលើដីឯកជនក្នុងភូមិសាស្ត្ររាជធានីភ្នំពេញ និងផ្ទៀងផ្ទាត់ទ្រព្យសម្បត្តិរដ្ឋនៅតាមក្រសួង អង្គភាពពាក់ព័ន្ធ ដើម្បីកាត់ចេញពីបញ្ជីសារពើភ័ណ្ឌរបស់រដ្ឋ សម្រាប់ប្រទានកម្មជូនប្រជាពលរដ្ឋ។ បន្ទាប់ពីផ្ទៀងផ្ទាត់ជាមួយក្រសួងសេដ្ឋកិច្ច និងហិរញ្ញវត្ថុ រដ្ឋបាលសុរិយោដី ត្រូវចុះបញ្ជីដីធ្លីផ្តល់ប័ណ្ណកម្មសិទ្ធិជូនប្រជាពលរដ្ឋតាមការកាន់កាប់ជាក់ស្តែង។ គណៈកម្មការអន្តរក្រសួងនេះ ក៏មានសិទ្ធិបង្កើតក្រុមការងារបច្ចេកទេសតាមការចាំបាច់ដែលមានសមាសភាពមកពីក្រសួងស្ថាប័នពាក់ព័ន្ធ។ មួយវិញទៀត មានសិទ្ធិប្រើប្រាស់ត្រា និងថវិការបស់សាលារាជធានីភ្នំពេញ សម្រាប់ដំណើរការងាររបស់ខ្លួន។
សេចក្តីសម្រេចនេះ ត្រូវបានបង្កើតឡើងដើម្បីបញ្ចប់ជម្លោះដីធ្លីដ៏រាំរ៉ៃរវាងអាជ្ញាធរ និងប្រជាពលរដ្ឋដែលកំពុងរស់នៅលើដីរដ្ឋក្នុងរាជធានីភ្នំពេញ៕
ដោយ៖ សំរិត
...
