ខេត្តកណ្តាលៈ ទ្វារដែកមួយផ្ទាំងដ៏ធំនៃរបងរោងចក្រកាត់ដេរសម្លៀកបំពាក់យីហោ “QMI” ដែលមានទីតាំងស្ថិតនៅភូមិត្រយឹង ឃុំពើក ស្រុកអង្គស្នួល បានដួលរលំសង្កត់ពីលើបុរសជាសន្តិសុខយាមកាមនៅទៅនោះ បណ្តាលឲ្យរងរបួសយ៉ាងធ្ងន់កាលពីវេលាម៉ោង១៩ និង៣០នាទី ថ្ងៃទី២៤ ខែកក្កដា ឆ្នាំ២០១៥ ។
សន្តិសុខឯកជនដែលរងរបួសដោយសាទ្វារដែករលំសង្កត់លើនោះមានឈ្មោះ ប៉ាង រស់ ភេទប្រុស អាយុ៦០ឆ្នាំ ជនជាតិខ្មែរ មានទីលំនៅក្នុងភូមិបុស ឃុំរលាំងគ្រើល ស្រុកសំរោងទង ខេត្តកំពង់ស្ពឺ បានរសរបួសបែកក្បាលយ៉ាងធ្ងន់ត្រូវបានភាគីរោងចក្របញ្ជូនទៅសង្គ្រោះនៅមន្ទីរពេទ្យសម្ភពថ្នល់ទទឹងក្នុងស្រុកអង្គស្នួល ។
មន្ត្រីនគរបាលស្រុកអង្គស្នួលបានឲ្យដឹងថា នៅមុនពេលកើតហេតុជនរងគ្រោះខាងលើនេះបានចូលទៅបម្រើការងារនៅក្នុងរោងចក្រជាធម្មតា ហើយបានដើរទៅបើកទ្វាររបងដើម្បីឲ្យកម្មករ កម្មការីនីបម្រើការងារនៅក្នុងរោងចក្រចេញ-ចូល ខណៈកំពុងរុញទ្វារបងបើកស្រាប់តែទ្វារនោះដួលរលំសង្កត់ពីលើជនរងគ្រោះ បណ្តាលឲ្យរងរបួសបែកក្បាលយ៉ាងធ្ងន់ធ្ងរតែម្តង ៕ស្អាងជ័យ
