ភ្នំពេញ៖ បើយោងតាមប្រភពព័ត៌មានពីក្រសួងបរិស្ថាន បានឱ្យដឹងថា លោក នេត្រ ភក្ត្រា រដ្ឋលេខាធិការក្រសួងបរិស្ថាន នៅព្រឹកថ្ងៃទី១៦ ខែសីហា ឆ្នាំ២០២២នេះ បានចូលរួមជាអធិបតីភាពពិធីប្រគល់ទទួលធុងសំរាមពីក្រុមហ៊ុនឯកជន នៅទីស្តីការក្រសួងបរិស្ថាន។
ក្រសួងបរិស្ថាន បានបន្ថែមថា ធុងសំរាមដែលទទួលបានចំនួន ១០ ត្រូវបានលោករដ្ឋលេខាធិការ ប្រគេនដល់ព្រះចៅអធិការវត្តពោធិ៍សាលព្រឹក្សហៅវត្តទួលស្វាយ នៅក្នុងឃុំខ្ពបតាងួន ស្រុកស្ទឹងត្រង់ ខេត្តកំពង់ចាម។
លោក នេត្រ ភក្ត្រា បានថ្លែងអំណរគុណដល់ក្រុមហ៊ុន ដែលបានចូលរួមឧបត្ថម្ភធុងសំរាម ដើម្បីយកទៅដាក់នៅតាមទីវត្តអារាម ចូលរួមក្នុងការថែរក្សាអនាម័យបរិស្ថានជាពិសេសគ្រប់គ្រងសំណល់រឹងរាវឱ្យបានត្រឹមត្រូវ។
ជាមួយគ្នានេះ លោករដ្ឋលេខាធិការ ក៏បានថ្លែងអំណរគុណដល់ព្រះសង្ឃនៃវត្តពោធិ៍សាលព្រឹក្សហៅវត្តទួលស្វាយ ដែលបានគិតគូរពីការថែរក្សាអនាម័យបរិស្ថានក្នុងវត្តអារាម និងជំរុញលើកទឹកចិត្តព្រះសង្ឃបន្ថែមរៀបចំទីវត្តទៅជាអារាមមេត្រីបរិស្ថានដើម្បីជាទីគោរពសក្ការៈបូជាដែលមានសោភ័ណភាពស្អាត៕
ដោយ៖សហការី
