ខេត្តពោធិ៍សាត់៖ គ្រោះធម្មជាតិដ៏សាហាវដោយរន្ទះបាញ់ស្លាប់ប្ដីយ៉ាងអាណោចអាធ័មចំណែកប្រពន្ធរងរបួសយ៉ាងធ្ងន់ធ្ងរ ខណៈពួកគាត់បណ្ដើរគាមកពីឃ្វាលក្របីនៅសល់តែប្រមាណ៣០ម៉ែត្រទៀតប៉ុណ្ណោះដល់ផ្ទះ។
ហេតុការណ៍គ្រោះធម្មជាតិដោយរន្ទះបាញ់ខាងលើនេះ បានកើតឡើងកាលពីវេលាម៉ោង៣រសៀលថ្ងៃទី១២ ខែឧសភា ឆ្នាំ២០១៦ ស្ថិតក្នុងភូមិព្រៃឪម៉ាល់ សង្កាត់រលាប ក្រុង-ខេត្តពោធិ៍សាត់។
សមត្តកិច្ចនគរបាលប៉ុសិ៍្ដរដ្ឋបាលរលាបបានឲ្យដឹងថា បុរសរងគ្រោះត្រូវបានគេស្គាល់ឈ្មោះ មឿន សុភ័ក្រ្ត អាយុ២៦ឆ្នាំ រស់នៅភូមិ សង្កាត់កើតហេតុ រីឯប្រពន្ធឈ្មោះ មូល ស្រីតូច អាយុ២២ឆ្នាំ ។ សមត្ថកិច្ចបន្តថា ក្រោយពីពិនិត្យនៅជុំវិញកន្លែងកើតហេតុឃើញថា ប្ដីប្រពន្ធរងគ្រោះពួកគាត់បានដើរបណ្ដើរគ្នាមកពីឃ្វាលក្របីនិងរកត្រពាំងរួមទាំងក្មួយប្រុសម្នាក់ទៀតផងដែរ គ្រានោះមេឃស្រទំពណ៌ខ្មៅកល់រកភ្លៀងលាយឡាំខ្យល់ខ្លាំងតែមិនភ្លៀងទេ នៅពេលពួកគាត់ដើរជិតដល់ផ្ទះនូវសល់ចម្ងាយប្រមាណ៣០ម៉ែត្រទៀត ស្រាប់តែមានភ្នែកបន្ទោលឆ្វាកៗបាញ់គ្រាំងតែម្តងធ្វើឲ្យប្ដីប្រពន្ធដួលរដូករណេលនៅលើដីវាលស្រែក្បែផ្ទះ ក្មួយប្រុសក៍ស្រែកហៅគេឯងឲ្យជួយបង្កការឆោឡោតែម្តង នូវពេលបងប្អូនរត់មកស្រវ៉ាលើកបុរសជាប្ដី ប៉ុន្តែគាត់បានដាច់ខ្យល់ស្លាប់បាត់បង់ជីវិតទៅហើយ ចំណែកប្រពន្ធរបួសយ៉ាងធ្ងន់ធ្ងរត្រូវបានគេដឹកមកសង្រ្គោះនៅមន្ទីរពេទ្យបង្អែកខេត្តភ្លាមឯផងដែរ។
ប្រភពព័ត៌មានពីនគរបាលបន្តទៀតថា បន្ទាប់សមត្តកិច្ចជំនាញពិនិត្យឃើញពិតជាស្លាប់ដោយសារគ្រោះធម្មជាតិពិតប្រាកដមែននោះក៍បានប្រគល់សាកសពឲ្យក្រុមគ្រួសារចាត់ចែងបន្តតាមប្រពៃណី៕
ដោយ៖ ប៉ឹម ពិន
...
