ខេត្តកំពង់ឆ្នាំង៖ បើតាមប្រភពព័ត៌មានពីរបាយការណ៍របស់ស្នងការដ្ឋាននគរបាលខេត្តកំពង់ឆ្នាំង បានឱ្យដឹងនៅព្រឹកថ្ងៃសុក្រទី១៩ ខែសីហា ឆ្នាំ២០២២នេះថា៖ ផ្ទះប្រជាពលរដ្ឋមួយខ្នង នៅស្រុកបរិបូណ៌ ត្រូវអគ្គិភ័យលេបត្របាក់ស្ទេីរទាំងស្រុង ដោយសារតែឆ្លងចរន្តអគ្គិសនីបង្កជាអគ្គិភ័យឆាបឆេះយ៉ាងសន្ធោសន្ធៅផ្អើលដល់ប្រជាពលរដ្ឋ និងសមត្ថកិច្ចមូលដ្ឋាននាំគ្នាចុះអន្តរគមន៍បាញ់ពន្លត់។
របាយការណ៍ដដែលបន្តថា ហេតុការណ៍ខាងលេីនេះ បានកេីតឡេីងវេលាម៉ោង៦ និង៣០នាទីយប់ ថ្ងៃទី១៨ ខែសីហា ឆ្នាំ២០២២ ស្ថិតនៅចំណុចភូមិក្រោយជី ឃុំពពេល ស្រុកបរិបូណ៌ ខេត្តកំពង់ឆ្នាំង បណ្ដាលឲ្យឆេះផ្ទះប្រជាពលរដ្ឋមួយខ្នង ទំហំ៦,៦ម៉ែត្រ គុណ ១០ម៉ែត្រ សង់ពីឈើដំបូលក្បឿង ជញ្ជាំងក្ដា ជារបស់ម្ចាស់ឈ្មោះ ហ៊ុយ សាម៉ាក់ ភេទប្រុស អាយុ៥៦ឆ្នាំ។
គួរបញ្ជាក់ថា មូលហេតុបណ្តាលមកពីឆ្លងចរន្តអគ្គិសនីក្នុងផ្ទះ ពេលកើតហេតុរថយន្តអគ្គិភ័យរបស់អធិការដ្ឋាននគរបាលស្រុកបរិបូណ៌បានចេញអន្តរាគមន៍បាញ់ពន្លត់ប្រើប្រាស់ទឹកអស់ចំនួន ០២រថយន្ត ទើបរលត់ទាំងស្រុង ហើយមិនបណ្ដាលឲ្យមានគ្រោះថ្នាក់ដល់មនុស្សឡើយ ៕
ដោយ៖សហការី
