ភ្នំពេញ៖ ដើម្បីអនុវត្តនៅតាមភូមិ-សង្កាត់មានសុវត្តិភាពនៅក្នុងមូលដ្ឋានលោក ចាន់ បណ្ឌិត នាយករងរដ្ឋបាលខណ្ឌដូនពេញ បានដឹកនាំកម្លាំងគណៈបញ្ជាការឯកភាពចុះបង្ក្រាបទីតាំងហ្គេមបាញ់ត្រីមួយកន្លែងដោយគ្មានច្បាប់ ហើយជាលិទ្ធផលឃាត់ខ្លួនប្តីប្រពន្ធ២នាក់ផងដែរ ។
ករណីខាងលើនេះបានធ្វើឡើងកាលពីវេលាម៉ោង១១និង១៥នាទីយប់ថ្ងៃទី១២ ខែឧសភា ឆ្នាំ២០១៦ នៅចំណុចផ្ទះលេខ៧៦ ក្រុម ២៤៧ ភូមិ២០ សង្កាត់ស្រះចក ខណ្ឌដូនពេញ ។
ក្នុងប្រតិបត្តិការបង្រ្កាបទីតាំងហ្គេមបាញ់ត្រីខាងលើនេះ ដោយមានការអនុញាតិពីលោក ស្រី ម៉ាកនី ព្រះរាជ្ញារងអមសាលាដំបូងរាជធានីភ្នំពេញ និងមានបញ្ជាផ្ទាល់ពីលោក គួច ចំរើន អភិបាល នៃគណៈអភិបាលខណ្ឌដូនពេញ ។
លោក ចាន់ បណ្ឌិត បានឲ្យដឹងថា ម្ចាស់ទីតាំងដែលសមត្ថកិច្ចឃាត់ខ្លួនទី១-ឈ្មោះ ម៉ៅ សំអូន និងប្រពន្ធឈ្មោះ ឈឿន លីណា ផ្ទះលេខ ៧៦ ក្រុម២៤៧ ភូមិ២០ សង្កាត់ស្រះចក ខណ្ឌដូនពេញ និងបានដកហូតទូហ្គេមបាញ់ត្រី ១ទូ ។
លោក ចាន់ បណ្ឌិត បន្តទៀតថា ទីតាំងខាងលើនេះក្រុមការងារចម្រុះខណ្ឌបានបង្ក្រាបចំនួន ៣លើករួចមកហើយ តែម្ចាស់ផ្ទះនៅតែរឹងទទឹងមិនព្រមឈប់ជួលផ្ទះដល់ម្ចាស់ហ្គេមនោះ ហើយលើកនេះអាជ្ញាធរនិងអនុវត្តតាមវិធានការច្បាប់គឺសូមឲ្យម្ចាស់ចូលមកបង្ហាញខ្លួននៅចំពោះមុខច្បាប់ផងដែរ ។ ចំណែកឯប្តីប្រពន្ធ២នាក់ដែលសមត្ថកិច្ចត្រូវឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញដើម្បីបញ្ចូនទៅសាលាដំបូងរាជធានីភ្នំពេញចាត់ការតាមនិតិវិធី ៕
ដោយ៖ ស ដារ៉ា
...
