ខេត្តបាត់ដំបង៖ បើទោះជាមនុស្សសត្វពិតណាស់ថា មានញាណសារជាតិជានិច្ច ស្រលាញ់ អាណិតកូនដែលប្រសូត្រចេញពីផ្ទៃ ទោះអាក្រក់ ស្អាត ក្នុងស្ថានភាពមានឬក្រ លំបាកយ៉ាងណាក៏ដោយ។ ជាក់ស្ដែងពិតជាគួរឲ្យសង្វេគដ៏ពន់ពេក កាលបើបានឃើញពីទិដ្ឋភាព ពីរនាក់ប្ដីប្រពន្ធ ព្រោះតែស្ថានភាពជីវភាពរស់នៅប្រចាំថ្ងៃទីទ័លក្រ ស្ត្រីជាប្រពន្ធពពោះគ្រប់ខែទៅហើយ បែរជាសុខចិត្តមកតាមប្ដីដើម្បីស្វែងរកការងារធ្វើ ជាកម្មករស៊ីឈ្នួលនៅតាមចម្ការនាព្រំដែន។ ប៉ុន្តែការស្វះស្វែងរកការងារធ្វើរបស់អ្នកទាំងពីរមិនទាន់និងបានផង ស្រាប់តែប្រពន្ធបានឈឺពោះរហូតដល់សម្រាលកូននៅក្នុងព្រៃ ដ៏កណ្ដោចកណ្ដែង តែសំណាងល្អឬធ្វើបុណ្យទទួលបានកុសល្យផលបុណ្យ ពីរនាក់ប្ដីប្រពន្ធ ក៏មានក្រុមគ្រូពេទ្យប្រកបដោយចិត្តធម៌និងវិជ្ជាជីវៈ ក្រមសិលធម៌បានជួយយកអាសារ សង្គ្រោះឲ្យស្ត្រីដ៏កំសត់រួចផុតពីគ្រោះថ្នាក់ទាំងម្ដាយនិងកូន។
ហេតុការណ៍ដ៏កម្រនិងកើតមានបែបនេះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី១២ ខែឧសភា ឆ្នាំ២០១៦ ស្ថិតនៅចំណុចភូមិសាមគ្គី ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ជាប់ព្រំដែនកម្ពុជា-ថៃ ។
បុរសជាប្ដីបាននិយាយប្រាប់អ្នកស្រុកនិងក្រុមគ្រួពេទ្យក៏ដូចជាអាជ្ញាធរទាំងទឹកភ្នែកផងដែរថា ភរិយារបស់គាត់មានឈ្មោះ ឆូយ វន អាយុ៣៣ឆ្នាំ រស់នៅភូមិ-ឃុំឆករការ ស្រុកសំឡូត ខេត្តបាត់ដំបង ។ ពួកគាត់ទាំងពីរនាក់មានកូនក្នុងបន្ទុកចំនួន៥នាក់ ហើយកូនដែលសម្រាលក្នុងព្រៃនេះជាកូនទី៦ ដោយស្ថានភាពលំបាកគាត់និងភរិយាបានបង្ខំចិត្តចាកចេញពីផ្ទះ ដើម្បីស្វះស្វែងរកការងារ ធ្វើជាកម្មករស៊ីឈ្នួលនៅតាមព្រំដែន ។ បុរសជាប្ដីបន្តថា ភរិយាគាត់បានប្រាប់ថា មិនទាន់គ្រប់ខែនៅឡើយទេ ម្លោះហើយក៏សម្រេចចិត្ថប្រឹងរកលុយ ដើម្បីទុកបម្រើការពេលប្រពន្ធឆ្លងទន្លេ មិនតែប៉ុណ្ណោះប្រពន្ធរបស់គាត់ក៏បានសុំមកជាមួយធ្វើការងារទាំងអស់គ្នា។ ពេលចេញពីផ្ទះជិះឡានឈ្នួលមកដល់ស្រុកភ្នំព្រឹក ខណៈភរិយាមានការហេវហត់ គាត់ក៏បានទៅទិញបាយនិងទឹកញ៉ាំនិងដើរស្វែងរកការងារ ប៉ុន្តែមិនទាន់រកបានធ្វើផងប្រពន្ធរបស់គាត់ក៏ត្អូញត្អែឈឺពោះសម្រាកកូន។ ឃើញទឹកមុខប្រពន្ធឈឺចាប់ទ្រាំនិងការពពោះនេះហើយភ័យផងនោះ គាត់ក៏បាននាំប្រពន្ធចេញពីក្នុងព្រៃដើម្បីដើរសំដៅទៅកាន់ភូមិអ្នកស្រុក សុំការស្នាក់អាស្រ័យ។ តែមិនទាន់ដល់ភូមិផងប្រពន្ធរបស់គាត់ក៏បានសម្រាលកូននៅចំកណ្ដាលព្រៃ ឆ្លេឆ្លារកអ្នកស្រុកឲ្យជួយ ដោយគាត់បានរត់ទៅសំពះអ្នកនៅជិតភូមិឲ្យជួយប្រពន្ធរបស់គាត់។ ពេលនោះអ្នកភូមិក៏ភ្ញាក់ផ្អើលនិងនាំគ្នាមកមើល និងជួយ ខ្លះទៀតប្រកបដោយចិត្តធម៌រត់ទៅជួយហៅគ្រូពេទ្យឲ្យមកជួយសម្រាលបានទាន់ពេលវេលា ។
ប្រជាពលរដ្ឋនិយាយថា ភ្លាមៗនោះមានគ្រូពេទ្យចំនួន២នាក់បានមកកាន់ទីតាំងកន្លែងស្ត្រីកំពុងឈឺពោះឆ្លងទន្លេក្នុងព្រៃ ទើបការជួយសង្គ្រោះនេះប្រើពេលត្រឹម១០នាទីប៉ុណ្ណោះក៏ធ្វើឲ្យស្ត្រីដ៏កំសត់សម្រាលកូនរួចផុតពីគ្រោះថ្នាក់។
ទឹកចិត្តអ្នកភូមិ ពេលឃើញស្ត្រីសម្រាលកូនក្រខ្សត់ គួបផ្សំនិងប្ដីចេះលើកដៃសំពះទៅកាន់អ្នកភូមិឲ្យជួយជាមួយនិងទឹកភ្នែកនោះ មិនត្រឹមតែក្រុមគ្រូពេទ្យនិងអ្នកភូមិមកជួយសង្គ្រោះយកអាសារប៉ុណ្ណោះទេ ពួកគាត់ក៏បាននាំគ្នាប្រមែប្រមូលជាថវិកា តិចក្ដី ច្រើនក្ដី មានម្នាក់ ២,០០០រៀល, ៥,០០០រៀល និង ១០,០០០រៀល សរុបបានចំនួន ៣៤៨,០០០រៀល ប្រគល់ទៅឲ្យប្ដីសម្រាប់យកទៅចាត់ចែងដោះស្រាយថ្លៃបាយនិងការសម្រាកព្យាបាលនៅមន្ទីរពេទ្យ។
លោក ប៊ូ កុសល ជាគ្រូពេទ្យប្រចាំមណ្ឌលសុខភាពរស្មីសាមគ្គី នៃស្រុកភ្នំព្រឹកបានបញ្ជាក់ថា ក្រោយពីមានការរាយរាប់ពីប្រជាពលរដ្ឋអំពីហេតុការណ៍នេះ គាត់ក៏បានឲ្យក្រុមគ្រូពេទ្យចុះទៅកាន់ទីនោះ ដោយស្មារតីយកចិត្តទុកដាក់ ធ្វើយ៉ាងណាសង្គ្រោះជនរងគ្រោះទាំងម្ដាយនិងកូនឲ្យបានទាន់ពេលវេលា។ លោកបន្តថា ខ្ញុំរីករាយនិងថ្លែងអំណរគុណចំពោះក្រុមគ្រូពេទ្យ គាត់មានការទទួលខុសត្រូវគោរពភារកិច្ច តួនាទី ប្រកបតាមវិជ្ជាជីវៈ និងមានចិត្តសណ្ដោសជួយគ្នាទៅវិញទៅមកសម្រាប់គ្រាមានអាសន្ន។
បន្ទាប់ពីសម្រាលកូនក្នុងព្រៃរួច ក្រុមគ្រួពេទ្យបានបញ្ជាក់ថា ស្ត្រីសម្រាលកូនមានសុខភាពល្អធម្មតាទេ ហើយកូនស្រីទី៦កើតក្នុងព្រៃដ៏កម្សត់នេះមានទម្ងន់ ១.៧គីឡូក្រាម ត្រូវបានពួកគាត់ហៅរថយន្តដឹកយកទៅសម្រាកព្យាបាលបន្តនៅមន្ទីរពេទ្យបង្អែកស្រុកសំពៅលូន ៕
ដោយ៖ សុខ ខេមរា
