ក្លិប Premier League បានបំបែកកំណត់ត្រារបស់ពួកគេសម្រាប់ការចំណាយក្នុងទីផ្សារដោះដូរកីឡាកររដូវក្តៅ ខណៈដែលទីផ្សារដោះដូរកីឡាករនេះនឹងចប់នៅចុងខែសីហា។ នេះបើយោងតាមការវិភាគពីក្រុមហ៊ុនហិរញ្ញវត្ថុ Deloitte ។

 ក្រុមហ៊ុន Deloitte បានគណនាថា ក្លិបបានចំណាយប្រាក់១.៥ពាន់លានផោនមកទល់ពេលនេះក្នុងរដូវក្តៅនេះ ដែលលើសពីកំណត់ត្រាមុន១.៤ពាន់លានផោនក្នុងឆ្នាំ២០១៧។

នៅសល់មួយសប្តាហ៍ទៀតដែលត្រូវទៅរហូតដល់ទីផ្សារដោះដូរកីឡាករបិទនៅម៉ោង១១យប់ ថ្ងៃទី១ ខែកញ្ញា។ ការចំណាយនៅចំណុចដូចគ្នាក្នុងឆ្នាំ២០២១គឺទឹកប្រាក់៨៩៥លានផោន ហើយបានបន្តឈានដល់១.១ពាន់លានផោន។

លោក Chris Wood ជំនួយការនាយកនៅក្នុងក្រុមពាណិជ្ជកម្មកីឡារបស់ Deloitte បាននិយាយថា “កម្រិតកំណត់ត្រានៃការចំណាយដែលយើងបានឃើញនៅក្នុងទីផ្សារដោះដូរកីឡាកររដូវក្តៅនេះ រហូតមកដល់ពេលនេះផ្តល់សញ្ញាថា គំរូអាជីវកម្មរបស់ក្លិបPremier League កំពុងងើបឡើងវិញក្រោយវិបត្តិ Covid។ ខណៈដែលនេះគឺជាការលើកទឹកចិត្ត សារៈសំខាន់នៃក្លិបដែលបង្កើតគោលនយោបាយចំណាយប្រកបដោយការទទួលខុសត្រូវ និងប្រកបដោយនិរន្តរភាព មិនអាចនិយាយលើសពីនេះបានទេ“។

 ការផ្ទេរដ៏ធំបំផុតមួយចំនួនបានឃើញក្លិប Liverpool ចុះហត្ថលេខាលើខ្សែប្រយុទ្ធអ៊ុយរ៉ាហ្គាយ Darwin Nunez ពី Benfica ក្នុងតម្លៃដំបូង៦៤លានផោនក្នុងកិច្ចព្រមព្រៀងដែលអាចកើនឡើងដល់៨៥លានផោន ខណៈដែលក្លិប Manchester United បាននាំយកខ្សែបម្រើប្រេស៊ីល Casemiro ក្នុងតម្លៃ៦០លានផោនពី Real Madrid ក្នុងការផ្លាស់ប្តូរមួយ ដែលអាចមានតម្លៃ៧០លានផោន។

ក្លិបមាន់ខ្នាយមាស Tottenham Hotspur បានចុះហត្ថលេខាលើខ្សែប្រយុទ្ធប្រេស៊ីល Richarlison ពី Everton ក្នុងការផ្លាស់ប្តូរមួយដែលត្រូវបានគេជឿថា មានតម្លៃ៦០លានផោន ហើយ Manchester City បានធានាការមកដល់របស់ខ្សែប្រយុទ្ធន័រវេសErling Haaland ក្នុងតម្លៃ៥១.២លានផោនពី Borussia Dortmund ។

 ខ្សែប្រយុទ្ធសញ្ជាតិអង់គ្លេស Raheem Sterling បានចូលរួមជាមួយក្លិប Chelsea ក្នុងកិច្ចព្រមព្រៀង៥០លានផោន ខណៈដែលក្រុមតោខៀវក៏បានចុះហត្ថលេខាលើខ្សែការពារអេស្ប៉ាញ Marc Cucurella ពី Brighton ក្នុងការផ្លាស់ប្តូរតម្លៃជាង៦០លានផោន។

 រហូតមកដល់ពេលនេះកីឡាករចំនួន១៤នាក់ត្រូវបានចុះហត្ថលេខាដោយក្លិបនៅ Premier League សម្រាប់តម្លៃដែលត្រូវបានរាយការណ៍បង្ហាញថា ច្រើនជាង៣០លានផោន ធៀបនៅការដោះដូរក្នុងអំឡុងពេលទីផ្សារដោះដូរកីឡាកររដូវក្តៅកាលពីឆ្នាំ២០២១៕ (រូបភាព ៖ BBC Sport)