ភ្នំពេញ ៖ រថយន្ត២គ្រឿងបុកគ្នានៅផ្លូវបែកជាបួន
ប៉ើងក្រឡាប់ទៅផ្ទប់បង្គោលស្លាកប៉ាណូ បណ្តាលឲ្យបុរស៣នាក់ រងរបួសធ្ងន់និងស្រាល ត្រូវបានរថយន្តសាមុយដឹកយកទៅសង្រ្គោះភ្លាមៗ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីម៉ោង ១រំលងអធ្រាត្រឈានចូលថ្ងៃទី២៧ ខែសីហា ឆ្នាំ២០២២ ស្ថិតនៅតាមបណ្តោយផ្លូវបេតុងថ្មី ក្នុងសង្កាត់គ្រាំងធ្នង់ ខណ្ឌសែនសុខ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បានបើករថយន្តម៉ាកfortaner ពណ៌ត្រេអុី ពាក់ស្លាកលេខ ខេមរភូមិន្ទ ០២-៧៩៧៧ ធ្វើដំណើរតាមបណ្តោយផ្លូវបេតុង ក្នុងទិសដៅពីលិចមកកើតយ៉ាងលឿន ខណៈមកដល់ចំណុចកើតហេតុ បានបើកឆ្លងផ្លូវបំបែកជាបួន ដល់ពាក់កណ្តាលផ្លូវ ស្រាប់តែគេឃើញរថយន្តម៉ាកកាមរីពណ៌ឈាមជ្រូកពាក់ស្លាកលេខ (ឃ.៣៥៧២ ពភ២) បើកបរដោយបុរសម្នាក់រួមដំណើរជាមួយបុរស២នាក់ទៀត ធ្វើដំណើរតាមបណ្តោយផ្លូវបេតុង ក្នុងទិសដៅពីត្បូងមកជើងក្នុងល្បឿនយ៉ាងលឿនដូចគ្នា មិនប្រយ័ត្នក៏ជ្រុលទៅបុករថយន្តម៉ាកfortaner ពេញទំហឹងប៉ើងក្រឡាប់ទៅផ្ទប់បង្គោលស្លាកប៉ាណូ បណ្តាលឲ្យបុរស៣នាក់រងរបួសរថយន្តធ្ងន់ស្រាល ត្រូវបានរថយន្តសាមុយដឹកយកទៅសង្រ្គោះបន្ទាន់ភ្លាមៗ។
បន្ទាប់ពីកើតហេតុសមត្ថកិច្ចមូលដ្ឋានដ្ឋានបានចុះមកដល់ទំនាក់ទំនងទៅសមត្ថកិច្ចជំនាញចរាចរណ៍ចុះមកវាស់វែងស្ទូចយករថយន្តទាំងពីរគ្រឿងទៅរក្សាទុកនៅការិយាល័យចរាចណ៍ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ៕

ដោយ៖ជ្រោយពេជ្រ