ខេត្តកំពង់ចាម៖ រថយន្តដឹកដំឡូងបានបើកបុកកិនទៅលើយុវជនម្នាក់ស្លាប់យ៉ាងវេទនា និង២នាក់ទៀតរងរបួសធ្ងន់ស្រាល កាលពីយប់ថ្ងៃទី១៣ ខែឧសភា ឆ្នាំ២០១៦ ស្ថិតនៅក្បែរគល់ស្ពានគីហ្សូណា សង្កាត់វាលវង់ ក្រុង-ខេត្តកំពង់ចាម។
សមត្ថកិច្ចបានឲ្យដឹងថា មុនពេលកើតហេតុរថយន្តធុនធំមួយគ្រឿង ដឹកដំឡូងមីចេញពីស្រុកចំការលើឆ្ពោះទៅវៀតណាម ប៉ុន្តែធ្វើដំណើរខ្វះតែប្រមាណតែ៥០០ម៉ែត្រទៀតដល់ស្ពានគីហ្សូណាក៏បុកទៅលើម៉ូតូមួយគ្រឿងមកពីម្ខាងផ្លូវយ៉ាងពេញទំហឹងបណ្តាលឲ្យយុវជនម្នាក់ត្រូវបានរថយន្តកិនយ៉ាងសំប៉ែតដូចចេកចៀនអូសជាច្រើនម៉ែត្រ ចំណែកយុវជន២នាក់ទៀតបានខ្ទាតពីម៉ូតូរងរបួសធ្ងន់ និងស្រាល។
ក្រោយពេលកើតហេតុអ្នកបើកបររថយន្តបង្កហេតុបានព្យាយ៉ាងរត់គេចខ្លួន ខណៈជនរងគ្រោះត្រូវបានអ្នកជិតខាងព្យាយាមហៅរថយន្តសាមុយដឹកយកទៅសង្គ្រោះនៅមន្ទីរពេទ្យបង្អែកខេត្ត។
សមត្ថកិច្ចអះអាងថា រថយន្តដឹកដំឡូងមីមួយគ្រឿងនេះកន្លងទៅធ្លាក់បានបង្កគ្រោះថ្នាក់ចរាចរណ៍ម្តងរួចមកហើយ ប៉ុន្តែខាងតុលាការធ្វើការដោះលែងកាលពីថ្មីៗកន្លងទៅនេះ។
លោក បែន រ័ត្ន ស្នងការនគរបាលខេត្តកំពង់ចាមក៏បានបញ្ជាក់ផងដែរថា រថយន្តបង្កហេតុពិតជាធ្លាប់បង្កគ្រោះថ្នាក់ចរាចរណ៍ ហើយខាងតុលាការដោះលែងពេលសមត្ថកិច្ចបញ្ជូនសំណុំរឿងទៅកាន់សាលាដំបូងតាមនីតិវិធី៕
ដោយ៖ សុខ ខេមរា
