ខេត្ដសៀមរាប ៖ ខ្យល់កន្ត្រាក់លាយឡំនិងភ្លៀងផង បណ្ដាលឲ្យផ្ទះ និងស្តង់លក់ដូររបស់ប្រជាពលរដ្ឋចំនួន២៩ខ្នង ត្រូវរងការខូចខាតនិងមនុស្ស៤នាក់រងរបួសក្នុងនោះមានស្រីម្នាក់ផងដែរ។
ហេតុការណ៍គ្រោះធម្មជាតិនេះកើតឡើងនៅវេលាម៉ោង២និង៣០នាទីរសៀលថ្ងៃទី១៥ ខែឧសភា ឆ្នាំ២០១៦ ក្នុងភូមិចំនួន៦ នៃក្រុងសៀមរាប។
មន្ត្រីមូលដ្ឋានបានឲ្យដឹងថា នៅវេលាម៉ោង២និង៣០នាទីរសៀល នៅសង្កាត់ចុងឃ្នៀស ក្រុងសៀមរាប មានហេតុការណ៍ភ្លៀងលាយខ្យល់កន្ត្រាក់បណ្ដាលឲ្យផ្ទះ និងស្តង់លក់ដូរ របស់បងប្អូនប្រជាពលរដ្ឋចំនួន២៩ខ្នងត្រូវរងការខូចខាត ក្នុងនោះរលំចំនួន៧ខ្នង របើកដំបូលចំនួន២២ខ្នង មនុស្សរងរបួសស្រាល៤នាក់ ស្រី១នាក់ ក្នុងភូមិចំនួន៦ នៃសង្កាត់ចុងឃ្នៀស ក្រុងសៀមរាប។
គួរកត់សម្គាល់ផងដែរថា នៅខេត្តសៀមរាបមានករណីគ្រោះធម្មជាតិបានកើតឡើងនៅតាមបណ្ដាលស្រុក និងក្រុងសៀមរាប បណ្ដាលឲ្យផ្ទះសម្បែងប្រជាពលរដ្ឋ រងការបំផ្លិចបំផ្លាញអស់ជាច្រើនខ្នង។ ករណីគ្រោះធម្មជាតិនេះ ពលរដ្ឋស្នើទៅអាជ្ញាធរពាក់ព័ន្ធ ជាពិសេសសប្បុរសជនមេត្តាជួយដល់គ្រួសាររបស់ពួកគាត់ផង៕
ដោយ៖ ជានិរន្ដរ៍
