ខេត្តពោធិ៍សាត់៖​ យ៉ាងហោចបុរសម្នាក់បានស្លាបបាត់បង់ជីវិតភ្លាមៗនៅនិងកន្លែង ហើយ២នាក់ទៀតរងរបួសយ៉ាងធ្ងន់ធ្ងរ​ ដោយសារគ្រោះថ្នាក់ចរាចរណ៍ម៉ូតូបុកម៉ូតូ ខណៈកំពុងធ្វើដំណើរបញ្រ្ចាស់ទិសគ្នា។​

ហេតុការណ៍នេះបានកើតឡើងកាលពីវេលាម៉ោង៥និង៤៥នាទីល្ងាចថ្ងៃទី១៦​ ខែឧសភា​ ឆ្នាំ២០១៦​ នៅលើផ្លូវក្រាលកៅស៊ូ​ ស្ថិតក្នុងភូមិបាកាន​ ឃុំត្រពាំងជង​ ស្រុកបាកាន​ ខេត្តពោធិ៍សាត់។​

សមត្ថកិច្ចបានឲ្យដឹងថា បុរសរងគ្រោះស្លាប់ឈ្មោះ​ គង់​ ភិន​ អាយុ៥៦ឆ្នាំ​ រស់នៅភូមិបត់រំដួល​ ឃុំផ្ទះរុង​ ស្រុកភ្នំក្រវាញ​ ​ឯអ្នករួមដំណើរឈ្មោះ​ គង់​ ភ័ណ្ឌ​ ភេទប្រុសអាយុ៤៥ឆ្នាំ​ រស់នៅភូមិឃុំជាមួយគ្នារងរបួសធ្ងន់​ ហើយអ្នកទាំង២នាក់នេះធ្វើដំណើររួមគ្នាដោយម៉ូតូ១គ្រឿងម៉ាក​ហុងដា​ សេ១២៥​ ពណ៌ខ្មៅ​ ពាក់ស្លាកលេខ​ពោធិ៍សាត់​ 1A-0006 ធ្វើដំណើរក្នុងទិសដៅពីត្បូងទៅជើង លុះមកដល់ចំណុចកើតហេតុបានបុកជាមួយម៉ូតូ១គ្រឿងទៀត​ពេញទំហឹងខណៈកំពុងធ្វើដំណើរបញ្រ្ចាស់ទិសគ្នាពីជើងទៅត្បូង​ បណ្ដាលឲ្យរងរបួសធ្ងន់ទាំងសង្ខាងនិងរងការខូចខាតវត្ថុតាងយ៉ាងដំណំដូចគ្នាផងដែរ។​

ប្រភពបន្តថា​ ម៉ូតូភាគគីម្ខាងទៀតម៉ាក​ ហុងដាសេ១២៥​ ពណ៌ខ្មៅ​ ស្លាកលេខ​ពោធិ៍សាត់ 1C-0004 បើកបរដោយឈ្មោះ​ ផាន់​ រ៉ន​ ភេទប្រុស​ អាយុ៣២ឆ្នាំ​ រស់នៅភូមីព្រះចំបក់​ ឃុំត្រពាំងជង​ ស្រុកបាកាន​ ខេត្តពោធិ៍សាត់រងរបួសធ្ងន់។​

ប្រភពបន្តទៀតថា​ សាកសពបានប្រគល់ឲ្យសាច់ញាតិយកទៅចាត់ចែងតាមប្រពៃណី​ ចំណែកអ្នករងរបួសបានបញ្ជូនភ្លាមៗទៅសង្រ្គោះនៅមន្ទីរពេទ្យបង្អែកស្រុកបាកាន​ ដោយឡែកម៉ូតូជាវត្ថុតាងសមត្តកិច្ចនគរបាលយកទៅរក្សាទុកនៅប៉ុស្តិ៍នគរបាលរដ្ឋបាលត្រពាំងជង​ ដើម្បីរងចាំធ្វើការដោះស្រាយគ្នាតាមនិតិវិធី៕​

ដោយ៖ បឹុម​ ពិន