ខេត្តកណ្តាល៖ ព្រែកសំរោង ស្ថិតក្នុងឃុំកោះធំខ ស្រុកកោះធំ ខេត្តកណ្តាល ត្រូវបានក្រសួងធនធានទឹក និងឧតុនិយម បើកការដ្ឋានស្តារឡើងវិញ កាលពីថ្ងៃទី ២១ ខែធ្នូ ឆ្នាំ ២០១៥ កន្លងទៅ ។

មកដល់ពេលនេះ ដំណើរការស្តារឡើងវិញព្រែកសំរោង ប្រវែង ៣.៦០០ ម៉ែត្រ រួមជាមួយនឹងការសាងសង់សំណង់សិល្បការមួយចំនួនទៀត សម្រេចលទ្ធផលបានប្រមាណ ៧០ ភាគរយ ហើយ ដោយគ្រោងនឹងបញ្ចប់នៅអំឡុងដើមខែកញ្ញា ឆ្នាំ ២០១៦ ខាងមុខ ។

ក្រោយពេលស្តាររួច ព្រែកសំរោង នឹងដើរតួនាទីនាំទឹក និងដីល្បប់ពីទន្លេបាសាក់ ទៅស្រោចស្រពដីស្រែរបស់បងប្អូនប្រជាកសិករ ប្រមាណ ១៣៧ ហិកតា ។ ទន្ទឹមនឹងនោះ ភ្លឺអមសងខាងព្រែក សរុបប្រវែង ៣.៨០០ ម៉ែត្រ ដែលក្រសួងបាន និងកំពុងស្ថាបនាដោយក្រាលកំទេចថ្ម នឹងក្លាយទៅជាផ្លូវលំជនបទដ៏ប្រសើរ សម្រាប់សម្រួលដល់ការធ្វើដំណើរ និងដឹកជញ្ជូនកសិផលរបស់បងប្អូនប្រជាពលរដ្ឋតំបន់នោះផងដែរ ៕

ដោយ៖ សុវណ្ណារ៉ា