ភ្នំពេញ៖ ក្រុមបាល់ទាត់វ័យចាស់ ចំនួន៣ក្រុម នឹងធ្វើការប្រកួត គ្នារយៈពេល៣ថ្ងៃ ជាជំនួបប្រកួត លក្ខណៈមិត្តភាពអន្តរជាតិដែលគេប្រសិទ្ធនាមថា“ពានរង្វាន់ឯកឧត្តមខៀវកញារីទ្ធ” ដោយមានក្រុមបាល់ទាត់វ័យចាស់មកពីប្រទេសឡាវ ថៃនិងកម្ពុជា ប្រព្រឹត្តទៅពី ថៃ្ងទី១៨ដល់ថៃ្ងទី២០ខែឧសភាឆ្នាំ២០១៦ ។

លោក សើម សារ៉ន អតីតកីឡាករបាល់ទាត់ជម្រើសជាតិ មានប្រសាសន៍ថា ដើម្បីត្រៀមធ្វើការប្រកួតជាមួយក្រុមវ័យចាស់ មកពីប្រទេសថៃនិងឡាវ ក្រុមរបស់លោកបានធ្វើការសម្រួលសាច់ដុំឲ្យមានចលនាល្អជាមុនសិនសម្រាប់ឲ្យ សមាជិកក្នុងក្រុមលេងបានស៊ីចង្វាក់គ្នា នៅក្នុងអំឡុងពេលប្រកួត។

លោកបន្តទៀតថា ការប្រកួតបាល់ទាត់ដណ្តើមពានរង្វាន់ឯកឧត្តម ខៀវ កាញារីទ្ធនឹងដំណើរការចាប់ពីថៃ្ងទី១៨ ខែឧសភាដល់ថៃ្ងទី២០ខែឧសភា ឆ្នាំ២០១៦ទើបបញ្ចប់ ដោយមានក្រុមចូលរួមចំនួន៤ក្រុម មានដូចជាក្រុមវ័យចាស់កម្ពុជា២ក្រុម ក្រុមវ័យចាស់ថៃមួយក្រុម និងក្រុមវ័យចាស់ឡាវមួយក្រុម។លោកបន្ថែមទៀតថា ការប្រកួតបាល់ទាត់វ័យចាស់អន្តរជាតិដណ្តើមពានរង្វាន់ ឯកឧត្តមខៀវកញ៉ារិទ្ធរដ្ឋមន្រ្តីក្រសួងព័ត៌មាននាពេលនេះ ធ្វើឡើងក្នុងគោលបំណងផ្សារភ្ជាប់ទំនាក់ទំនងគ្នា រវាងក្រុមវ័យចាស់ដែលជាអតីតកីឡាករជម្រើសជាតិ ក្នុងប្រទេសនីមួយៗ និងបង្កើនភាពជិតស្និទ និងរឹតចំណងសាមគ្គីភាព ជាមួយប្រទេសជិតខាង ក្នុងនាមជាប្រទេសបងប្អូន ដោយមានព្រំដែនជាប់គ្នានោះ។ការប្រកួតមិត្តភាពអន្តរជាតិបាល់ទាត់វ័យចាស់នេះ គឺបានធ្វើឡើងជាច្រើនលើកមកហើយ ជួនកាលកម្ពុជាទៅប្រកួតនៅប្រទេសថៃ និងប្រទេសវៀតណាមឡាវជាដើម។

ដោយឡែកលោក អោក សំណាង បានបញ្ជាក់ថា ការប្រកួតបាល់ទាត់វ័យចាស់អន្តរជាតិដណ្តើមពានរង្វាន់ ឯកឧត្តមខៀវកញារីទ្ធរដ្ឋមន្រ្តីក្រសួងព័ត៌មាននេះគឺជាលើកទី១ដែលបានរៀបចំឡើងដើម្បីបំផុសឲ្យវិស័យកីឡាបាល់ទាត់នៅកម្ពុជាកាន់តែមានប្រជាប្រិយភាពនិងទាក់ទាញ បញ្រ្ជាបដល់យុវជនឲ្យចូលរួមលេងកីឡាជៀសឆ្ងាយពីគ្រឿងញៀននិងអំពើអបាយមុខផ្សេងៗដែលនាំឲ្យសង្គមស្អប់ខ្ពើមហើយងាកមកលេងកីឡាបានទាំងសុខភាពនិងប្រាជ្ញាវាងវៃ។

លោកបានធ្វើការអំពាវនាវឲ្យ ប្រជាពលរដ្ឋចូលរួមទស្សនាការប្រកួតបាល់ទាត់វ័យចាស់អន្តរជាតិដណ្តើមពានរង្វាន់ឯកឧត្តមខៀវកាញារីទ្ធឲ្យបានច្រើនកុះករក្នុងន័យគាំទ្រលើកទឹកចិត្តដល់កីឡាករវ័យចាស់របស់កម្ពុជាផង។

គួររំលឹកថា នៅថៃ្ងទី១៨ ខែឧសភា ក្រុមបាល់ទាត់វ័យចាស់កម្ពុជាត្រូវជួបប្រកួតជាមួយក្រុមបាល់ទាត់វ័យចាស់របស់ប្រទេសឡាវ ហើយថៃ្ងទី១៩ ខែឧសភា ក្រុមវ័យចាស់កម្ពុជា ជួបជាមួយនឹងក្រុមបាល់ទាត់វ័យចាស់មួយក្រុមទៀតដែលជំនួសប្រទេសវៀតណាមដែលខកខានមិនបានប្រកួតនោះ ហើយនៅថៃ្ងទី២០ ខែឧសភាដែលជាថៃ្ង ផ្តាច់ព្រ័ត្រក្រុមបាល់ទាត់កម្ពុជាប្រកួតជាមួយក្រុមបាល់ទាត់ប្រទេសថៃ ៕

ដោយ៖ សារីម