រុស្ស៊ីក៏ដូចជាអាមេរិកបានចាប់អារម្មណ៍យ៉ាងខ្លាំងទៅលើប្រទេសនៅក្នុងតំបន់អាស៊ាន ដែលជាតំបន់មានសក្តានុពលយ៉ាងខ្លាំងលើវិស័យសេដ្ឋកិច្ច។ ទាំងនោះហើយបានជាមានកិច្ចប្រជុំកំពូល អាមេរិក អាស៊ាន ចិនអាស៊ាន ហើយពេលនេះរុស្ស៊ីនិងអាស៊ាន។ សកម្មភាពទាំងនោះបានបង្ហាញឲ្យឃើញថា ប្រទេសមហាអំណាចនៅលើពិភពលោកបានចាប់អារម្មណ៍យ៉ាងខ្លាំងមកលើតំបន់អាស៊ាន។
ប្រព័ន្ធផ្សព្វផ្សាយនៅម៉ូស្កូចាប់អារម្មណ៍ថា គឺជាលើកដំបូងដែលនាយករដ្ឋមន្ត្រីថ្មីនៃប្រទេសវៀតណាម លោក Nguyen Xuan Phuc ធ្វើទស្សនកិច្ចនៅរុស្ស៊ី ក្រោយពីបេក្ខភាពគាត់ត្រូវបានរដ្ឋសភាវៀតណាមអនុម័តគាំទ្រកាលពីថ្ងៃ៧ ខែមេសា កន្លងទៅ ដោយសម្លេងអ្នកតំណាងរាស្ត្រដល់ទៅ ៤៤៦ លើ ៤៩០សម្លេង។
រុស្ស៊ីធ្វើជាម្ចាស់ផ្ទះទទួលជំនួបកំពូលរុស្ស៊ី-អាស៊ាន លើកទី២០ ហើយក្នុងបរិបទនេះ លោកនាយករដ្ឋមន្ត្រីវៀតណាម ដែលបានអញ្ជើញមកដល់រុស្ស៊ីមុនគេនារសៀលថ្ងៃ១៦ ខែឧសភា ម្សិលមិញ បានជួបចរចាជាមួយលោកប្រមុខរដ្ឋាភិបាលរុស្ស៊ី ដោយផ្តោតការយកចិត្តទុកដាក់ទៅលើទំនាក់ទំនងទ្វេភាគី។ ជាលទ្ធផលជំនួបគូភាគីបានព្រមព្រៀងគ្នា បង្កើនទំហំផ្តោះប្តូរពាណិជ្ជកម្មតាមរយៈការសមិទ្ធិគម្រោងវិនិយោគ ហើយដាក់ឲ្យដំណើរការក្នុងខែមិថុនាខាងមុខទៅហើយ គឺលំហពាណិជ្ជកម្មសេរី។
លោកប្រមុខរដ្ឋាភិបាលរុស្ស៊ី ឌីមីទ្រី ម៉េដវេដេវ បានបញ្ចេញយោបល់ថា ជាបឋមត្រូវតែខំប្រឹងប្រែងយ៉ាងណាដើម្បីឲ្យទំហំពាណិជ្ជកម្មទ្វេភាគីកើនឡើងយ៉ាងបង្គួរតាមរយៈការសមិទ្ធិគម្រោងវិនិយោគទាំងអម្បាលម៉ានរបស់ប្រទេសទាំងពីរ។ បន្ទាប់មកត្រូវដាក់ឲ្យដំណើរការលំហពាណិជ្ជកម្មសេរី ដែលមានជានីតិន័យ ទៅហើយរវាងប្រទេសយើង បានន័យថា រវាង ម្ខាង គឺ វៀតណាម និងម្ខាងទៀត គឺ សហភាពសេដ្ឋកិច្ចអឺរ៉ុប-អាស៊ី សហភាពដែលមាន៥ប្រទេសជាសមាជិកគឺ រុស្ស៊ី កាហ្សាក់ស្ថាន បេឡារុស អារមេនី និងកៀហ្ស៊ីស៊ីស្ថាន។
លោក ម៉េដវេដេវ ថ្លែងថា៖ វៀតណាមនិងរុស្ស៊ី ជាដៃគូជំនិតនឹងគ្នា ក៏ប៉ុន្តែសហប្រតិបត្តិការនៅមិនទាន់ធំធេងសម្បើម ដូចក្តីប្រាថ្នារបស់គូភាគីឡើយ សូម្បីសហប្រតិបត្តិការនេះនាំមុខដោយ ក្រុមហ៊ុនយក្សរុស្ស៊ីខាងឧស្ម័ន Gozprom និងក្រុមហ៊ុនប្រេងវៀតណាម Petrovietnam ក្តី។ ទំហំពាណិជ្ជកម្មសព្វថ្ងៃ មិនឆ្លើយស្របសោះឡើយនឹងសក្តានុពលប្រទេសទាំងពីរ។ ទោះយ៉ាងណាក្តីក៏ ១/៣ នៃទំហំនាំចេញរបស់រុស្ស៊ីទៅអាស៊ីអគ្នេយ៍គឺពិតជាធ្លាក់ទៅលើវៀតណាម ។
មិនតែប៉ុណ្ណោះ បើក្នុងឆ្នាំមុន ទំហំផ្តោះប្តូរនោះបានមានទឹកប្រាក់ចន្លោះ ៤,០០០លានដុល្លារនោះក្នុងឆ្នាំនេះ គូភាគីសង្កេតឃើញទំនោរកើនឡើងទៅហើយ ទាំងក្នុងស្ថានការណ៍ស្មុគស្មាញក៏ដោយ ។
លោកនាយករដ្ឋមន្ត្រីរុស្ស៊ី គូសបញ្ជាក់ជាពិសេសថា វៀតណាមជាប្រទេសដែលបានផ្តើមគំនិតភ្ជាប់ខ្លួនមកនឹងលំហពាណិជ្ជកម្មសេរី ជាមួយសហភាពសេដ្ឋកិច្ចអឺរ៉ុប-អាស៊ី ហើយឥឡូវកំពុងប្រព្រឹត្តទៅនីតិវិធី ខាងផ្តល់សច្ចាប័ន ដល់កិច្ចព្រមព្រៀងនោះ។
លោកនាយករដ្ឋមន្ត្រីវៀតណាម Nguyen Xuan Phuc ពីចំណែកខ្លួនសម្ដែងនូវជំនឿជឿជាក់ថា លំហពាណិជ្ជកម្មសេរីនោះនឹងចូលជាធរមានពេញលេញគឺនៅខែមិថុនា ខាងមុខទៅហើយ ដោយនិងផ្តល់សន្ទុះយ៉ាងខ្លាំងដល់វិស័យពាណិជ្ជកម្ម។ តាមប្រសាសន៍គាត់ វៀតណាមកំពុងពង្រីកជាបណ្តើរៗទៅលើទំហំផ្តោះប្តូរជាមួយរដ្ឋឯទៀត នៃលំហពាណិជ្ជកម្មសេរីនោះ យោងទៅលើកិច្ចព្រមព្រៀងទ្វេភាគី សរុបទៅចំនួន ១៣ច្បាប់ឯណោះ ដែលបង្គ្រប់គ្នាទៅវិញទៅមក៕
ប្រែសម្រួល៖ ម៉ែវសាធី
