ខេត្តសៀមរាប៖ កម្លាំងការិយាល័យនគរបាលខេត្ដ នគរបាលស្វាយលើ និងស្រុកវ៉ារិន បានធ្វើការឃាត់ខ្លួនជនសង្ស័យប្រុសស្រីចំនួន១៧នាក់ ក្នុងនោះមានប្រពន្ធចុងអធិការនគរបាលស្រុកម្នាក់ ពាក់ព័ន្ធការជួញដូរ និងប្រើបា្រស់គ្រឿងញៀនបញ្ជូនទៅតុលាការខេត្ត ។
ហេតុការណ៍ចុះបង្ក្រាបករណីជូញដូរនិងប្រើប្រាស់គ្រឿងញៀនខាងលើនេះបានធ្វើទ្បើងនៅក្នុងរយៈពេល៣ថ្ងៃ គឺថ្ងៃទី១៨.១៩.២០ ខែឧសភា ឆ្នាំ២០១៦ ស្ថិតនៅចំណុចក្នុងភូមិសាស្ត្រ ស្រុកស្វាយលើ ស្រុកវ៉ារិន ខេត្តសៀមរាប ខណៈពួកគេបានទិញយកទៅលក់បន្តនៅតាមបណ្តាស្រុកនិងតាមផ្ទះសំណាក់ ក្នុងក្រុងសៀមរាប។
លោកវរៈសេនីយ៍ ទោ អ៊ុំ សាអាត នាយការិយាល័យ ប្រឆាំងគ្រឿងញៀន បានឲ្យដឹងថាការចុះប្រតិបត្តិការបង្ក្រាបករណីជួញដូរនិងប្រើបា្រស់នូវសាធាតុញៀនដោយខុសច្បាប់ រហូតឈានដល់ធ្វើការឃាត់ខ្លួនបានជនសង្ស័យប្រុសស្រីចំនួន១៧នាក់ជាបន្តបន្ទាប់ ហើយស្ត្រីដែលគេស្គាល់ថាជាប្រពន្ធចុងអធិការស្រុកប្រាសាទបាគង ខេត្ដសៀមរាប ឈ្មោះ យិន ប៉ុណ្ណារី ហៅញ៉ច អាយុ៥៦ឆ្នាំ មុខរបរគ្មាន រស់នៅភូមិជប់លើ ឃុំស្វាយលើ ស្រុកស្វាយលើ ខេត្តសៀមរាប(ជួញដូរ) និងចាប់យកវត្ថុតាងរួមមាន៖ ម្សៅមេតំហ្វេតាមីន(ម៉ាទឹកកក)១កញ្ចប់ ទម្ងន់០,១ក្រាម ទូរស័ព្ទដៃចំនួន៥គ្រឿង ម៉ូតូ១គ្រឿងម៉ាកMSX ពណ៌ក្រហម និងឧបករណ៍ប្រើប្រាស់ថ្នាំញៀនមួយចំនួនផងដែរ។
បច្ចុប្បន្នជនសង្ស័យប្រុស ស្រី ចំនួន១៧នាក់និងវត្ថុតាង ត្រូវបានកម្លាំងជំនាញបញ្ជូនទៅកាន់តុលាការ នៅរសៀលថ្ងៃទី២១ខែឧសភាឆ្នាំ២០១៦ ដើម្បីចាត់ការតាមផ្លូវច្បាប់៕
ដោយ៖ ជានិរន្ដរ៍
