ខេត្តស្វាយរៀង: លោក ជុក មុន្នី រដ្ឋលេខាធិការក្រសួងមុខងារសាធារណៈតំណាង លោក ព្រំុសុខា រដ្ឋមន្ត្រីក្រសួងមុខងារសាធារណៈបានអញ្ជើញជាអធិបតីក្នុង
ប្រជុំផ្សព្វផ្សាយលិខិតបទដ្ឋានគតិយុត្តិនានាពាក់ព័ន្ធនឹងការគ្រប់គ្រងបុគ្គលិករដ្ឋបាលថ្នាក់ក្រោមជាតិ នៅខេត្តស្វាយរៀងនាថ្ងៃទី ១៧ ខែតុលា ឆ្នាំ ២០២២ នៅសាលប្រជុំសាលាខេត្តស្វាយរៀង។
ក្នុងឪកាសនោះ ក៏មានការចូលរួមពី សំណាក់លោកអនុរដ្ឋលេខាធិការ លោកអគ្គនាយកនៃអគ្គនាយកដ្ឋានគ្រប់គ្រងមុខងារសាធារណះ លោកអភិបាលរងខេត្តស្វាយរៀង លោកគង់ចាន់ថនប្រធានមន្ទីរ លោកលោកស្រីអភិបាលរងក្រុងស្រុកប្រធានមន្ទីរអនុប្រធានមន្ទីរដែលពាក់ពន្ធ័ជាច្រើននាក់ផងដែរ។
ថ្លែងក្នុងឪកាសនោះលោករស់ផារិទ្ធ អភិបាលរងខេត្តស្វាយរៀង រដ្ឋបាលខេត្ត ស្វាយរៀងបាន និងកំពុងផ្ដោតការយកចិត្តទុកដាក់ពង្រឹងការគ្រប់គ្រងមន្ត្រីរាជការ តាមរយៈ វិធានការអប់រំណែនាំ ដល់មន្ត្រីរាជការឱ្យមានទឹកចិត្តស្រលាញ់ការងារ និងមានភាពស្វាហាប់ក្នុងការបំពេញ ការងារ ប្រកាន់ខ្ជាប់នូវឥរិយាបថទាំង៤ វប្បធម៌សេវាសាធារណ: មនសិការវិជ្ជាជីវ: ឆន្ទៈម្ចាស់ការ និងភក្តីភាព លុបបំបាត់ភាពអសកម្ម និងជំរុញឱ្យមន្ត្រីរាជការមកបំពេញការងារឱ្យបានទៀងទាត់ ស្របតាមបញ្ញត្តិដែលមាន កំណត់នៅក្នុងអនុក្រឹត្យលេខ៥៦ អនក្រ.បក ស្តីពីការគ្រប់គ្រងវត្តមានមន្ត្រីរាជការស៊ីវិល និងមន្ត្រីជាប់កិច្ចសន្យា ពង្រឹងការតែងតាំង ផ្លាស់ប្តូរ ការបញ្ចប់ភារកិច្ចមន្ត្រីរាជការ ដោយឈរលើគោលការណ៍ច្បាប់ នីតិវិធី លក្ខណ សម្បត្តិ និងអតីតភាពការងារ ប្រកបដោយតម្លាភាពគណនេយ្យភាព និងសមធម៌។
លោកបន្ថែមថា ដើម្បីធានាការអភិវឌ្ឍប្រកបដោយចីរភាព និងបរិយាប័ន្ន រាជរដ្ឋាភិបាលបានចាត់ទុកកំណែទម្រង់ អភិបាលកិច្ច គឺជាកិច្ចការដ៏មានសារៈសំខាន់ក្នុងការជំរុញការអភិវឌ្ឍសេដ្ឋកិច្ច និងសង្គម ដើម្បីឈានឆ្ពោះទៅ សម្រេចបាននូវឋានៈជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមាន ចំណូលខ្ពស់នៅឆ្នាំ២០៥០។
ដើម្បីសម្រេចបាននូវគោលដៅនេះ រាជរដ្ឋាភិបាល បាននិងកំពុងធ្វើទំនើបកម្ម យ៉ាងទូលំទូលាយ និងស៊ីជម្រៅនូវប្រព័ន្ធអភិបាលកិច្ចតាមរយៈកម្មវិធីកំណែទម្រង់នានារួមមាន កម្មវិធីកំណ ទម្រង់វិមជ្ឈការ និងវិសហមជ្ឈការ(កំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ) កម្មវិធីកំណែរទម្រង់រដ្ឋបាលសាធារណ:កម្មវិធី
កំណែរទម្រង់ការគ្រប់គ្រងហិរញ្ញវត្ថុ កម្មវិធីកំណែរទម្រង់
ច្បាប់និងប្រពន្ធ័យុត្តិធម៏និងកម្មវិធីកំណែរទម្រង់តាមវិស័យនានា។
ក្នុងឪកាសនោះ លោកជុកមុន្នី រដ្ឋលេខាធិការក្រសួងមុខងារសាធារណៈបានលើកឡើងថា ការផ្សព្វផ្សាយនេះ មានសេចក្តីណែនាំចំនួន ២ ដែលពាក់ព័ន្ធនឹងការគ្រប់គ្រងមន្ត្រីនៅថ្នាក់ក្រោមជាតិ។ ទី ១ គឺផ្តោតសំខាន់លើសេចក្តីណែនាំលេខ ៤៣០៧/២២ មស. សណន ស្តីពីនីតិវិធីនៃការផ្តល់ទិដ្ឋាការលើការផ្លាស់ប្តូរស្ថានភាពរដ្ឋបាល និងគ្រួសាររបស់មន្ត្រីរាជការស៊ីវិលនៅថ្នាក់ក្រោមជាតិដល់រដ្ឋបាលខេត្ត រដ្ឋបាលក្រុង រដ្ឋបាលស្រុក និងមន្ទីរអង្គភាពជុំវិញខេត្តស្វាយរៀង។
និងទី ២ គឺទាក់ទងទៅនឹងសេចក្តីណែនាំស្តីពីគោលការណ៍ បែបបទ នីតិវិធីនៃការគ្រប់គ្រងបុគ្គលិក រដ្ឋបាលខេត្ត ក្រុង ស្រុក។
លោក បន្តថា លោករដ្ឋមន្ត្រី បានបង្កើតឱ្យមានក្រុមការងារបន្ថែមទៀត ដើម្បីចុះទៅផ្ទៀងផ្ទាត់ធាតុចូលការប្រមូលនៅទូទាំង ២១ រាជធានី-ខេត្តទៀត ហើយសេចក្តីណែនាំនេះ ត្រូវបានដាក់អនុវត្តជាផ្លូវការ។
ហើយសម្រាប់សេចក្តីណែនាំទី ២ ស្តីពីការគ្រប់គ្រងមន្ត្រីថ្នាក់ក្រោមជាតិ យើងបានដឹងហើយថាសេចក្តីណែនាំនេះ គឺបំពេញឱ្យសេចក្តីណែនាំអនុវត្តកន្លងមក»។
លោក រដ្ឋលេខាធិការ បានលើកឡើងទៀតថា៖ «ដើម្បីស្វែងយល់បន្ថែមទៀតអំពីបទដ្ឋានគតិយុត្តនេះ បើបងប្អូនមានបញ្ហាអ្វីមិនទាន់ច្បាស់លាស់ ឬការអនុវត្តទៅមានការលំបាក សូមចូលរួមជាសំណួរដោយផ្ទាល់ តាមរយៈក្រុមតេឡេក្រាមដែលក្រុមការងារបានបង្កើត ដើម្បីយកទៅអនុវត្តនៅក្នុងមន្ទីរ អង្គភាព រដ្ឋបាលខេត្ត ក្រុង ស្រុក នីមួយៗឱ្យទទួលបានលទ្ធផលល្អប្រសើរ» ។
លោកបានបន្ថែមថា កិច្ចប្រជុំផ្សព្វផ្សាយលិខិតបទដ្ឋានគតិយុត្តនានាពាក់ព័ន្ធនឹងការគ្រប់គ្រងបុគ្គលិករដ្ឋបាលថ្នាក់ក្រោមជាតិនេះ គឺជាផ្លែផ្កានៃការអនុវត្តគោលនយោបាយវិមជ្ឈការរបស់រាជរដ្ឋាភិបាលកម្ពុជា ដែលបានធ្វើសមាហរណកម្មបង្ខិតសេវាមកកាន់តែជិតងាយស្រួលក្នុងការគ្រប់គ្រង និងផ្តល់សេវាជូនប្រជាពលរដ្ឋ។
ក្នុងឪកាសនោះលោកក៏បានស្នើដល់លោក លោកស្រី ប្រធានមន្ទីរ អង្គ ភាព លោក អភិបាល ក្រុង ស្រុក និងមន្ត្រីជំនាញពាក់ព័ន្ធទាំងអស់ យកចិត្តទុកដាក់ពិភាក្សា ឱ្យបានស៊ីជំរៅលើ កសារដែលវាគ្មិនធ្វើបទបង្ហាញសម្រាប់ទុកជាបទពិសោធន៍ ចំណេះដឹងយកទៅអនុវត្តនៅតាមអង្គភាពរៀងៗ នឱ្យបានត្រឹមត្រូវតាមគោលការណ៍ណែនាំប្រកបដោយប្រសិទ្ធភាព៕
ដោយ៖ សុថាន
