អ្នកជំនាញផ្នែកអចលនទ្រព្យបានឱ្យដឹងថា ទីផ្សារអចលនទ្រព្យរបស់វៀតណាមក្នុងឆ្នាំនេះត្រូវបានគេមើលឃើញថាមានការអភិវឌ្ឍខ្លាំង ខណៈដែលវៀតណាមនឹងក្លាយជាទីផ្សារប្រកបដោយទស្សនវិស័យដ៏ល្អបំផុតមួយក្នុងចំណោមទីផ្សារដ៏ល្អបំផុតនៅក្នុងតំបន់អាស៊ីនេះ។
លោក Marc Townsend ប្រធានក្រុមហ៊ុនអចលនទ្រព្យ CBRE Viet Nam បានឱ្យដឹងថា ទីផ្សារអចលនទ្រព្យរបស់ប្រទេសបានងើបឡើងវិញ បន្ទាប់ពីមានវិបត្តិហិរញ្ញវត្ថុកាលពីឆ្នាំ២០០៨។
លោកបានបន្ថែមទៀតថា តម្លៃលក់នៃអាផាតមិននៅក្នុងទីក្រុងហាណូយ និងហូជីមិញត្រូវបានគេមើលឃើញថា នឹងកើនឡើងយ៉ាងខ្លាំងចំពេលដែលមានតម្លៃដីកើនឡើងផងដែរ។
ក្រុមហ៊ុន CBRE បានព្យាករថាទីក្រុងធំទាំងពីរនេះនឹងមើលឃើញពីការអភិវឌ្ឍនៅក្នុងតំបន់ទីក្រុង។ តម្លៃផ្ទះជាមធ្យមមានភាពលេចធ្លោនៅក្នុងទីផ្សារនេះ ពោលគឺផ្ទះដែលមានតម្លៃប្រហែលជា ៤៤,៩៨៤ ដុល្លារសហរដ្ឋអាមេរិក។
នៅក្នុងឆ្នាំ២០១៦នេះ ការជួល និងទិញការិយាល័យនឹងក្លាយជាចំណុចគោលដៅចម្បងនៅទីផ្សារនេះ។ ទីក្រុងហាណូយ និងហូជីមិញ នឹងទាក់ទាញការវិនិយោគផ្ទាល់ពីបរទេស នៅពេលដែលកិច្ចព្រមព្រៀងដៃគូអន្តរប៉ាស៊ីហ្វិកចូលជាធរមាន។
លោកក៏បានបន្ថែមទៀតថា វិស័យរមណីយដ្ឋាននឹងមានភាពចង្អៀត ខណៈដែលវៀតណាមបានក្លាយជាទិសដៅថ្មីក្នុងការអភិវឌ្ឍតំបន់រមណីយដ្ឋាន ហើយឧស្សាហកម្មអលចនទ្រព្យនេះត្រូវបានគេរំពឹងថានឹងមានការអភិវឌ្ឍខ្លាំង។
លោកបានបន្ថែមទៀតថា វៀតណាមគួរតែបង្កើននូវតម្លាភាពក្នុងការអនុម័តគម្រោងអចលនទ្រព្យ និងពង្រឹងនូវការគ្រប់គ្រងដើម្បីទាក់ទាញអ្នកវិនិយោគបន្ថែមទៀត។
លោក Nguyen Duc Thanh នាយកគ្រប់គ្រងវិទ្យាស្ថានសេដ្ឋកិច្ច និងការស្រាវជ្រាវគោលនយោបាយបានមានប្រសាសន៍ថា ទីផ្សារអចលនទ្រព្យនេះត្រូវបានជំរុញឡើងតាមរយៈកត្តាម៉ាក្រូសេដ្ឋកិច្ចវិជ្ជមាន។ ច្បាប់ស្តីពីការគ្រប់គ្រងផ្ទះសម្បែងឆ្នាំ២០១៤ និងច្បាប់ពាណិជ្ជកម្មផ្នែកអចលនទ្រព្យឆ្នាំ២០១៤ បានផ្តល់គោលនយោបាយដ៏ធូរស្រាលមួយ ដើម្បីធ្វើឱ្យមានការអភិវឌ្ឍទីផ្សារអចលនទ្រព្យនេះ។
លោកបានបន្ថែមទៀតថា ការចូលជាធរមាននៃកិច្ចព្រមព្រៀងនេះនឹងធានាឱ្យមានលំហូរនៃការវិនិយោគបរទេសទៅកាន់ប្រទេសវៀតណាម ជាពិសេសលំហូរនៃការវិនិយោគផ្នែកទីផ្សារអចលនទ្រព្យ។
លោកបានបញ្ជាក់ថា តម្លៃគេហដ្ឋាននៅក្នុងទីក្រុងហាណូយ និងហូជីមិញនឹងទាបជាងប្រទេសផ្សេងៗដូចជា ចិន និងសិង្ហបុរី។ ទីផ្សារអចលនទ្រព្យនេះនឹងនៅតែបន្តមានសក្តានុពលសម្រាប់ការអភិវឌ្ឍបន្ថែមទៀត។
លោកបានបន្ថែមទៀតថា អស្ថិរភាពនៃទីផ្សារអចលនទ្រព្យនេះនឹងមិនត្រូវបានគេមើលឃើញនៅពេលនេះទេ។
លោក Vu Van Phan ប្រធាននាយកដ្ឋានគ្រប់គ្រងទីផ្សារអចលនទ្រព្យនិងគេហដ្ឋាននៃក្រសួងសាងសង់ និងសំណង់របស់វៀតណាមបានឱ្យដឹងថា ទីផ្សារនេះនឹងនៅតែមានការអភិវឌ្ឍប្រកបដោយស្ថិរភាព និងមានកំណើនជាបណ្តើរៗផងដែរ៕
ដោយ៖ សីលា
