ខេត្តក្រចេះ៖ រថយន្តយីឌុបដឹកឈើប្រណីត២គ្រឿង ត្រូវសមត្ថកិច្ចកងរាជអាវុធហត្ថខេត្តក្រចេះបង្ក្រាបឃាត់ កាលពីយប់ថ្ងៃទី២២ ខែឧសភា ឆ្នាំ២០១៦ នៅចំណុចភូមិជ្រោយ ឃុំគោលាប់ ស្រុកចិត្របុរី ខេត្តក្រចេះ ខណៈដឹកជញ្ជូនល្មើសច្បាប់ ។
លោក ទ្រី សុភក្រ្ត នាយខណ្ឌរដ្ឋបាលព្រៃឈើខេត្តក្រចេះបានឲ្យដឹងថា សមត្ថកិច្ចកងរាជអាវុធហត្ថខេត្តពិតជាបានបង្ក្រាបចាប់រថយន្តដឹកឈើទាំង២គ្រឿងនេះមែន ក្នុងនោះ ក៏បានឃាត់ខ្លួនមនុស្ស៥នាក់ មានតៃកុងឡាន២នាក់ និងព្រូឡាន៣នាក់ ដែលកម្លាំងកងរាជអាវុធហត្ថកំពុងសាកសួរ ដើម្បីរកឲ្យឃើញពីម្ចាស់ឈើ ឬក្រុមហ៊ុនមួយណា តាមនីតិវិធី ដើម្បីចាត់ការតាមវិធានការ ។
លោកទ្រី សុភក្រ្តបន្តថា បច្ចុប្បន្នសមត្ថកិច្ចមិនទាន់ដឹងថា ម្ចាស់ឈើជានរណាពិតប្រាកដនៅឡើយទេ ដូច្នេះបន្ទាប់ពីការសាកសួររួច នឹងបញ្ជូនឈើមកជំនាញរដ្ឋបាលព្រៃឈើ វាស់វែង ពីចំនួនពិតប្រាកដ ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ។
ដោយ៖ សុខ ខេមរា
