ខេត្តកណ្ដាល ៖ បុរសម្នាក់សង្ស័យស្រវឹងស្រា បានបើករថយន្តLexus Rx330 ពាក់ស្លាកលេខនគរបាល មួយគ្រឿង ធ្វេីដំណេីរក្នុងល្បឿនលឿនជ្រុលទៅបុករះបង្គោលឡាក់និងឡំប្រឺតាមួយគ្រឿង បណ្ដាលឲ្យបុរសម្នាក់រងរបួសធ្ងន់ ហេីយរថយន្តបង្កបន្តបុករបងផ្ទះប្រជាពលរដ្ឋរងការខូចខាត ទេីបធ្វេីឲ្យរថយន្តដាច់ក្រឡេកង់មុខម្ខាងទៅមុខលែងរួច ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលវេលាម៉ោង១១ និង៣០នាទីយប់ថ្ងៃចន្ទ ទី៧ ខែវិច្ឆិកា ឆ្នាំ២០២២ស្ថិតតាមបណ្ដោយផ្លូវជាតិលេខ២ ត្រង់ចំណុចរង្វង់មូលក្រុងតាខ្មៅ ក្នុងសង្កាត់ជ័យជំនះ ក្រុងតាខ្មៅ ខេត្តកណ្ដាល។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាក Lexus RX330 ពណ៌ស ពាក់ស្លាកលេខនគរបាល2-8768 បើកដោយបុរសម្នាក់សង្ស័យស្រវឹងស្រា ទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុខាងលើបានបុករះបង្គោលឡាក់បាក់អស់៥ដើម និងហោះទៅបុកឡំប្រឺតា ដែលចតលើចិញ្ចើមប៉ើងផ្ទប់និងរបងសាលាដំបូងខេត្តកណ្ដាល បណ្ដាលឲ្យម្ចាស់ឡំប្រឺតារងរបួសធ្ងន់ ។ ភ្លាមៗរថយន្តបង្កមិនព្រមឈប់ទទួលខុសត្រូវនោះទេ ដោយបានរញ៉ែថយក្រោយរួចបន្តដំណេីររហូតដល់ភូមិស្ទឹងជម្រៅ សង្កាត់ដើមមានក្រុងតាខ្មៅ ក៏ជ្រុលទៅបុករបងផ្ទះប្រជាពលរដ្ឋរងការខូចខាត ទេីបរថយន្តដាច់កង់មុខម្ខាងទៅលែងរួច ទេីបតៃកុងរថយន្តបង្កបានចុះរត់គេចខ្លួនបាត់ស្រមោល ។
ក្រោយកើតហេតុ សមត្ថកិច្ចជំនាញចរាចរណ៍ក្រុងតាខ្មៅ បានចុះមកធ្វេីការវាស់វែងស្ទូចរថយន្តបង្កនិងឡំប្រឺតាដែលរងការខូចខាត ទៅរក្សាទុករង់ចាំឲ្យម្ចាស់រថយន្តបង្កចូលខ្លួនមកដោះស្រាយតាមច្បាប់៕ 
ដោយ ៖ ភារ៉ា ដង្កោ
