ខេត្តព្រះសីហនុ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានថ្លែងឱ្យដឹងតាមរយៈបណ្ដាញសង្គមហ្វេសប៊ុកផ្លូវការរបស់លោក នៅព្រឹកថ្ងៃទី២៥ ខែវិច្ឆិកា ឆ្នាំ២០២២នេះថា៖ បន្ទាប់ពីបានជួបជាមួយកសិករកែច្នៃបង្គាក្រៀម នៅឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។
លោករដ្ឋមន្ត្រី បន្តថា ខ្ញុំសូមគាំទ្រ និងលេីកទឹកចិត្តដល់កសិករដែលធ្វើការនៅក្នុងសហគមនេសាទឱ្យមាននិរន្តភាព និងចូលរួមថែរក្សាបរិស្ថាន ហើយជំនាញនឹងជួយមើលក្នុងការថែរក្សាជម្រកបង្គា ក្តាម ជាពិសេសប្រសិនបើការប្រមូលទិញឃើញមានក្តាមញីពង គឺត្រូវលែងត្រឡប់ទៅវិញ ។
សូមជម្រាបដែរថា កាលពីថ្ងៃទី២២ ខែវិច្ឆិកា ឆ្នាំ២០២២ថ្មីៗនេះ លោករដ្ឋមន្ត្រី បានទៅដល់កោះអាចម៍សេះ និងបានស្វែងយល់ពីការងារអភិរក្សជលផលសមុទ្រកម្ពុជា អនុវត្តដោយអង្គការ Marines Cooperation Cambodia (MCC) ដោយមានការចូលរួមសហការយ៉ាងសកម្មពីអាជ្ញាធរយើង។ ជាមួយគ្នានោះ លោករដ្ឋមន្ត្រី បានណែនាំឱ្យរដ្ឋបាលជលផល អាជ្ញាធរខេត្ត និងអង្គការ MCC រួមគ្នាកំណត់ជីភីអេស (GPS) នៅលើផែនទីតំបន់ហាមឃាត់ ដើម្បីបងប្អូនប្រជានេសាទងាយស្រួលចូលរួមសហការអនុវត្ត។ ចំពោះអ្នកល្មើសច្បាប់ លោក ឌិត ទីណា ក៏បានលើកទឹកចិត្តឱ្យអាជ្ញាធរពង្រឹងវិធានការ ទាំងការអប់រំ ការដាក់សម្ពាធផ្លូវចិត្ត និងផ្លូវច្បាប់ ដើម្បីធានាការពារនិរន្តរជាតិធនធានសមុទ្រ។
បន្ថែមពីនេះ លោករដ្ឋមន្ត្រីកសិកម្ម បានគូសបញ្ជាក់ដែរថា៖ នៅតាមផ្លូវត្រឡប់មកវិញ លោកបានចូលរួមលែងក្តាមសេះញីមានពង ដើម្បីជួយបង្កើនបរិមាណក្តាម និងទម្លាក់ថ្មប្រអប់បេតុងចូលក្នុងសមុទ្រ ដើម្បីបង្កើតបានជាជម្រកការពារជលផលសមុទ្រពីការនេសាទខុសច្បាប់ផងដែរ៕ដោយ៖ស តារា
