ខេត្តសៀមរាប៖ កម្លាំងសមត្ថកិច្ចផ្នែករដ្ឋបាលព្រៃឈើខេត្តសៀមរាបបានចុះបង្រ្កាបបទល្មើសលក់សត្វព្រៃក្នុងភោជនីដ្ឋាជនជាតិចិនមួយកន្លែងដោយរឹបអូសសត្វព្រៃបានជាច្រើនគីឡូ ប៉ុន្ដែមិនដាក់ទោសអ្នកប្រព្រឹត្ដឡើយដោយគ្រាន់តែផាកពិន័យនិងធ្វើកិច្ចសន្យាបញ្ឈប់ប៉ុណ្ណោះ។
ប្រតិបត្ដិការនេះធ្វើឡើងនៅល្ងាចថ្ងៃទី២៩ ខែឧសភា ឆ្នាំ២០១៦ ក្នុងភូមិសាលាកន្សែងសង្កាត់ស្វាយដង្គំ ក្រុងសៀមរាប ។ ក្រោមការដឹកនាំពីលោក ថេង សំណាង ព្រះរាជអជ្ញារងអមសាលាដំបូងខេត្តសៀមរាប។
ភោជនីយដ្ឋានដែលលក់សាច់សត្វព្រៃនោះជារបស់ជនជាតិចិនដែលមានយីហោ «អិល អិល អាយ អិនស៊ីហ្វូត» (LLIN Sea Food) ស្ថិក្នុងតំបន់ទេសចរណ៍ក្រុងសៀមរាប។ សត្វព្រៃទាំងនោះត្រូវសមត្ថកិច្ចជំនាញយកទៅប្រលែងនៅអង្គការអភិរក្សមជ្ឍមណ្ឌលចម្រុះអង្គរ ACCB ភ្នំក្បាលស្ពាន ក្នុងស្រុកបន្ទាយស្រី។
លោក ម៉ុង ប៊ុនលីម នាយផ្នែករដ្ឋបាលព្រៃឈើបន្ទាយស្រីបានឲ្យដឹងថា ប្រតិបត្ដការនេះចាប់បានសត្វពស់ព្រៃ ២ក្បាល មានទម្ងន់៤គីឡូក្រាម និងអណ្ដើកព្រិចចំនួន ៧ក្បាលស្មើនិង៨គីឡូក្រាម។ ប៉ុន្ដែហាងលក់ដូរសាច់សត្វព្រៃនោះ សមត្ថកិច្ចមិនបានបិទនោះទេដោយគ្រាន់តែធ្វើកិច្ចសន្យា ផាកពិន័យនិងបញ្ឈប់នូវការជួញដូរ។
លោកបន្ថែមថា សត្វព្រៃដែលបង្ក្រាបបានសមត្ថកិច្ចបានសម្រេចដឹកយកប្រគល់ឲ្យអង្គការអភិរក្សមជ្ឍមណ្ឌលចម្រុះអង្គរ ACCB នៅចំណុចភ្នំក្បាលស្ពាន ភូមិឃុនរាម ឃុំឃុនរាម ស្រុកបន្ទាយស្រី ខេត្តសៀមរាប ។ យ៉ាងណាក៍ដោយតាមការសង្កេតឃើញកន្លងមកមានភោជនីយដ្ឋាន និងកន្លែងសេវាកំសាន្ដជាច្រើនទៀត នៅតំបន់ទេសចរណ៍អង្គរ បានជួញដូរសាច់សត្វព្រៃ បើទោះបីសមត្ថកិច្ចជំនាញដឹងក៍ដោយ ដែលគេសង្ស័យថាជាឆ្នាំបាយរបស់ពួកគេ៕
ដោយ៖ និរន្ដរ៍
