ខេត្តក្រចេះ៖​ បុរសជនជាតិវៀតណាមម្នាក់ឯកទេសសំណង់និង​អគ្គីសនីធ្វើការក្នុង​ក្រុមហ៊ុន​ទូរស័ព្ទ Metfone បានស្លាប់ដោយសារឆក់ចរន្តអគ្គីសនីធ្លាក់ពីលើផ្ទះថ្មជាន់​ទី១ នៅស្រុកឆ្លូង ខណៈដែលបុរសរងគ្រោះបានឡើងតភ្លើងលើកស្លាកឡូហ្គូ ហើយ​ភ្លាត់ស្នៀតឆក់ស្លាប់តែម្តង ។

ហេតុការភ្ញាក់ផ្អើលខាងលើនេះបានកើតឡើងកាលពីរសៀលថ្ងៃ​ទី៣០ ខែ​ឧសភា ឆ្នាំ២០១៦ នៅក្នុងភុមិជ្រោយថ្មលើ ឃុំឆ្លូង ស្រុកឆ្លូង ខេត្តក្រចេះ ។

នគរបាលស្រុកឆ្លូងបានឲ្យដឹងថា បុរសរងគ្រោះបានស្លាប់ក្រោយពេលបញ្ជូនមក​សង្រ្គោះ​​​នៅមន្ទីរពេទ្យបង្អែកឆ្លូង ក្រោយពីជនរងគ្រោះឆក់ខ្សែភ្លើងនៅពេលកំពុង​ឡើងលើកស្លាកឡូហ្គូទូរស័ព្ទ Metfone ។

អធិការនគរបាលស្រុកឆ្លូងលោកវរសេនីយ៍ទោ ឌួង សុទ្ឋី បានឱ្យដឹងថា ជនរងគ្រោះ​ជាជន​ជាតិវៀតណាមជំនាញខាងផ្នែកសាងសង់ដំឡើងឡូហ្គូក្រុមហ៊ុនទូរស័ព្ទ Metfone ​រូបនេះឈ្មោះ ជឿង មិនញឹក អាយុ២៩ឆ្នាំ ​ស្នាក់នៅរាជធានីភ្នំពេញ និងបាន​មកដំឡើងស្នាក់ការក្រុមហ៊ុន មិត្តហ្វូន នៅស្រុកឆ្លូងមាន​រយៈពេលប៉ុន្មានថ្ងៃ​មុនកើត​ហេតុ។

លោកអធិការបន្តថា ជនរងគ្រោះជាជនជាតិវៀតណាមរូបនេះពិតជាបានស្លាប់​ដោយសារឧប្បត្តិហេតុឆក់ចរន្តអគ្គិសនី ក្រោយពេលដែលជនរងគ្រោះរូបនេះ ធ្វើការមិនប្រយ័ត្ននិងបានប៉ះចំតំណរខ្សែរភ្លើងក៏ត្រូវឆក់និងរមៀលធ្លាក់ពីលើផ្ទះថ្មជាន់ទី១ មកហើយក៏ត្រូវស្លាប់ពេលបញ្ជូនមកសង្រ្គោះ ចំណែកសាកសពត្រូវបានប្រគល់ទៅឱ្យខាងក្រុមហ៊ុនដើម្បីចាត់ចែងបន្តទៅក្រុមគ្រួសាររងគ្រោះ ៕

ដោយ៖ កោះទ្រុង