ខេត្តកណ្តាល៖ មុខសញ្ញាជួញដូរគ្រឿងញៀន២នាក់ ត្រូវបានសមត្ថកិច្ចនគរបាលប៉ុស្តិ៍រដ្ឋបាលតាលន់ស្រាវជ្រាវឃាត់ខ្លួនបាន កាលពីវេលាម៉ោង១២ និង១៥នាទីរំលងអធ្រាត្រឈានចូលថ្ងៃទី៣១ ខែឧសភា ឆ្នាំ២០១៦ នៅត្រង់ចំណុចចំការពោតមួយកន្លែង ស្ថិតក្នុងភូមិតាលន់ ឃុំតាលន់ ស្រុកស្អាង ។
ប្រតិបត្តិការបង្រ្កាបឃាត់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាងពាក់ព័ន្ធរួមមាន៖ ថ្នាំញៀនប្រភេទមេតមហ្វេតាមីន ហៅម៉ាទឹកកក២កញ្ចប់ ,ទូរស័ព្ទដៃ១គ្រឿង និងម៉ូតូ១គ្រឿងម៉ាកហុងដាវ៉េវ ធុនសេ១១០ ពណ៌ខ្មៅ ពាក់ស្លាកលេខភ្នំពេញ 1BW-9720 ។
មន្ត្រីនគរបាលស្រុកស្អាងបានឲ្យដឹងថា ជនសង្ស័យទី១-ឈ្មោះ ផា សុភក្រ្ត័ ភេទប្រុស អាយុ២៦ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅក្នុងភូមិតាលន់ ឃុំតាលន់ ស្រុកស្អាង ទី២-ឈ្មោះ ណី វ៉ាន់ ហៅឌី ភេទប្រុស អាយុ២១ឆ្នាំ ជនជាតិខ្មែរ មុខរបរ កសិករ មានទីលំនៅក្នុងភូមិត្នោតញី ឃុំខ្ពប ស្រុកស្អាង ។
ប្រភពដដែលបានបន្តថា ជនសង្ស័យទាំង២នាក់នេះជាមុខសញ្ញាជួញដូរគ្រឿងញៀននៅក្នុងមូលដ្ឋានភូមិតាលន់ ដែលត្រូវបានសមត្ថកិច្ចនគរបាលប៉ុស្តិ៍កំណត់និងតាមដាននាពេលកន្លងមក ។ លុះមកដល់យប់ថ្ងៃទី៣០ ខែឧសភា ឆ្នាំ២០១៦ សមត្ថកិច្ចនគរបាលប៉ុស្តិ៍ទទួលបានព័ត៌មានថាជនសង្ស័យណាត់គ្នាធ្វើសកម្មភាពជួញដូរគ្រឿងញៀន នៅក្នុងចម្ការពោតមួយកន្លែងខាងលើ ។ បន្ទាប់ពីទទួលបានព័ត៌មានកម្លាំងនគរបាលប៉ុស្តិ៍បានចុះទៅឃ្លាំមើល រហូត១២រំលងអធ្រាត្រឈានចូលថ្ងៃទី៣១ ខែ/ឆ្នាំដដែល ទើបប្រទះឃើញជនសង្ស័យជិះម៉ូតូចូលទៅក្នុងចម្ការពោត ទើបកម្លាំងនគរបាលឆ្មក់ចូលទៅបង្រ្កាបឃាត់ខ្លួនរួមជាមួយវត្ថុតាងជាក់ស្តែង បញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមនីតិវិធីច្បាប់ ។
ជនសង្ស័យឈ្មោះផា សុភក្ត្រ័ បានសារភាពប្រាប់សមត្ថកិច្ចនគរបាលថា ថ្នាំញៀនខាងលើនេះរូបគេបានទិញពីមេក្លោងជួញដូរគ្រឿងញៀនម្នាក់មិនស្គាល់អត្តសញ្ញាណ នៅម្តុំពេទ្យលោសង្ឃ ក្នុងរាជធានីភ្នំពេញ ។ ថ្នាំញៀនម៉ាកទឹកកកនេះរូបគេទិញក្នុងតម្លៃ១០ម៉ឹនរៀល យកមកវេចខ្ចប់បាន៤កញ្ចប់តូចៗ ដើម្បីធ្វើសកម្មភាពជួញដូរទៅឲ្យអ្នកប្រើប្រាស់ ខណៈជួញដូរអស់២កញ្ចប់នៅសល់២កញ្ចប់ ក៏ត្រូវសមត្ថកិច្ចឃាត់ខ្លួណតែម្តង ៕
ដោយ៖ ស្អាងជ័យ
