ភ្នំពេញ ៖ ជនត្រូវចោទ ជាតិចិន និង ខ្មែរ ចំនួន៧នាក់ត្រូវបានក្រុមប្រឹក្សាសាលាដំបូងរាជធានីភ្នំពេញបើកសវនាការកាត់ទោសពាក់ព័ន្ធនិងសំណុំរឿង « រក្សាទុក ដឹកជញ្ជូន ផលិត និងជួញដូរគ្រឿងញៀន » បន្ទាប់សំណុំរឿងនេះត្រូវបានពន្យាពេលម្ដងហើយម្ដងទៀតអស់រយៈពេល២ឆ្នាំមកហើយ ។
ជនត្រូវចោទទាំង៧នាក់ដែលតុលាការកាត់ទោសរួមមាន ៖
១/ ឈ្មោះ Qiang Liang ភេទប្រុសជនជាតិចិន អាយុ៥៦ឆ្នាំ ។
២/ ឈ្មោះ តែ ម៉េងហួត ភេទប្រុស អាយុ៣០ឆ្នាំ ជនជាតិខ្មែ មេការឃ្លាំងស្តុកម៉ាសុីនផលិតគ្រឿងញៀន ។
៣/ ឈ្មោះ ហ្វុង ហាឡុង ភេទប្រុស អាយុ២៩ឆ្នាំ ជនជាតិខ្មែរ ជាអ្នកបើកបររថយន្តដឹកជញ្ជូន ។
៤/ ឈ្មោះ ជន ចិន្ដា ហៅម៉ាប់ ជនជាតិចិនតៃវ៉ាន់ ( រត់គេចខ្លួន) ។
៥/ ឈ្មោះ ហេង ម៉េងហូរ ជនជាតិចិន ( រត់គេចខ្លួន ) ។
៦/ ឈ្មោះ ហួរ ម៉េងកឺ ភេទប្រុស ជនជាតិចិន ( រត់គេចខ្លួន ) ។
៧/ ឈ្មោះ ឡៅ ប៉ាន់ ជនជាតិចិន ជាថៅកែ ( រត់គេចខ្លួួន) ។
នៅក្នុងសវនាការដែលដឹកនាំដោយលោក ធាម ចាន់ពិសិដ្ឋ ជាប្រធានក្រុមប្រឹក្សាជំនុំជំរះ និងលោក ហេង ផេង ជាតំណាងអយ្យការ ជនត្រូវចោទឈ្មោះ ហ្វុង ហាឡុង បានសារភាពថា តាមបញ្ជារបស់ថៅកែធំឈ្មោះ ឡៅ ប៉ាន់ នៅថ្ងៃទី ១៩ខែកុម្ភៈ ឆ្នាំ២០២០ ខ្លួនបានបើករថយន្តមួយតោនកន្លះដឹកឥវ៉ាន់មួយចំនួនមកប្រគល់អោយមេការឈ្មោះ Qiang Liang ភេទប្រុស លុះណាត់គ្នានៅមុខព្រលានយន្តហោះពោធ៍ចិនតុង ក៏ត្រូវសមត្ថកិច្ចចាប់ខ្លួនតែម្ដង ។
ចំណែកជនត្រូវចោទឈ្មោះ តែ ម៉េងហួត បានសារភាពថា ខ្លួនជាមេការឃ្លាំងដាក់សម្ភារៈនៅក្នុងខណ្ឌកំបូល ត្រូវបាន សមត្ថកិច្ចកោះហៅអោយចូលខ្លួនមកសាកសួរ ហើយក៏ត្រូវតុលាការឃុំខ្លួនតែម្ដង ។
ដោយឡែកជនត្រូវចោទឈ្មោះ Qiang Liang បានសារភាពថា ខ្លួនត្រូវថៅកែប្រាប់អោយមកចាំទទួលឥវ៉ាន់ដាក់ឃ្លាំងលុះពេលណាត់ជួបគ្នាក៏ត្រូវចាប់តែម្ដង ។
តាមឯកសារដែលតុលាការបង្ហាញត្រួសៗ យ៉ាងហោចណាស់មានសារធាតុគីមីដែលអាចផ្សំជាគ្រឿងញៀនចំនួន១១មុខ មានទំងន់រាប់រយគីឡូ និងម៉ាសុីនផលិតថ្នាំចំនួន១៤គ្រឿងត្រូវបានសមត្ថកិច្ចសន្តិសុខផ្ទៃក្នុងក្រសួងមហាផ្ទៃចាប់រឹបអូសនៅកន្លែងស្តុកទុកចំនួន៣កន្លែងផ្សេងគ្នាកាលពីដើមឆ្នាំ២០២០ ដូចជានៅឃ្លាំងស្តុកក្នុងខណ្ឌកំបូល , បាលីរីសតខណ្ឌជ្រោយចង្វារ និងខុនដូក្នុងខណ្ឌបឹងកេងកង ជាដើម ។
ក្នុងសំណុំរឿងគ្រឿងញៀន តំណាងអយ្យការបានស្នើអោយក្រុមប្រឹក្សាជំនុំជម្រះ ផ្ដន្ទាទោសក្រុមជនជាប់ចោទអោយបានធ្ងន់ធ្ងរតាមច្បាប់កំណត់ ។
ចុងក្រោយតុលាការបានប្រកាសពន្យាពេលប្រកាសសាលក្រមដោយមិនកំណត់ ៕ ដោយ រ៉ារ៉ា
