🔴ការដ្ឋានជីកកាយ បូមខ្សាច់ មួយកន្លែងស្ថិតនៅម្តុំដីព្រៃសហគមន៍ ឧត្តមស្រែពស់ (ចំណុចខ្សាច់ស) ស្ថិតក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ សង្ស័យអត់ច្បាប់ !

ចែករំលែក៖

ខេត្តកំពង់ស្ពឺ ៖ បន្ទាប់ពីបទល្មើសព្រៃឈើកន្លងទៅដឹកគគ្រឹកគគ្រែង នៅស្រុកឱរ៉ាល់ រហូតដល់ក្រុមការពារព្រៃឈើលោក Tan Kimsour លើកឡើងថា,
លើកនេះពួកយើងធ្វើឲ្យបែកសម្បុកបទល្មើសព្រៃឈើដ៏ធំនៅតំបន់ឱរ៉ាល់ ហើយបានបង្កភាពក្ដៅក្រហាយខ្លាំងណាស់។ លោកបន្តថា, បើបងប្អូនគិតឲ្យស៉ីជម្រៅបន្តិច បងប្អូននឹងគិតយល់ថាពួកយើងកំពុងតែជួយបងប្អូនទៅវិញទេ ជួយយ៉ាងម៉េច? គឺជួយឲ្យបងប្អូនរួចផុតពីគ្រោះហានិភ័យនានាដែលនឹងអាចកើតឡើងដោយក្រឡាប់គោយន្ត ដើមឈើបាក់សង្កត់លើ និងប្រឈមមុខជាមួយផ្លូវច្បាប់ ព្រោះពួកយើងជឿជាក់ថាបើអត់ពីការរកទទួលទានពីការប្រព្រឹត្តិបទល្មើសព្រៃឈើ ក៏បងប្អូនមិនបណ្ដែតបណ្ដោយឲ្យខ្លួនឯង និងក្រុមគ្រួសារដាច់ពោះស្លាប់ដែរ គឺបងប្អូននឹងនឹកគិតរកវិធីដែលល្អជាងនេះដើម្បីរកទទួលទានចិញ្ចឹមជីវិតជាក់ជាមិនខាន។ សូមជូនពរឲ្យសំណាងល្អទាំងអស់គ្នា។ លោក Tan Kimsour ក៏បានភ្ជាប់នូវរូបថតចុះល្បាតក្នុងព្រៃជាមួយក្រុមការងារ និងសមត្ថកិច្ចកងកម្លាំងប្រដាប់អាវុធផងដែរ។
បច្ចុប្បន្ននៅស្រុកឱរ៉ាល់ ខេត្តកំពង់ស្ពឺ បង្វែរមកធ្វើអាជិវកម្មបូមខ្សាច់ ដែលគេសង្ស័យថា,គ្មានច្បាប់អនុញ្ញាតពី អាជ្ញាធរ និងជំនាញ អាចកើតឡើងត្រឹមការឃុបឃិតគ្នាថ្នាក់មូលដ្ឋានក៏អាចថាបាន។

ថ្មីៗកន្លងទៅក៏មានបណ្តាសារព័ត៌មានខ្លះបានសរសេរជុំវិញបញ្ហាអាជីវកម្មខ្សាច់នេះ ប៉ុន្តែអាជ្ញាធរ ហាក់នៅគាំងត្រគាកបន្តិច ។
សូមរម្លឹកថា, ប្រភពខ្លះបានអោយដឹងថា,កាលពីអំឡុងចុងខែវិច្ឆិកា ឆ្នាំ២០២២ កន្លងទៅ មាននគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺមួយក្រុមមានគ្នា៣ទៅ៤នាក់បានជិះរថយន្តស៊េរីទំនើបៗបានទៅដល់ ការដ្ឋានជីកកាយ និងបូមខ្សាច់សង្ស័យអត់ច្បាប់មួយកន្លែងស្ថិតនៅម្តុំដីព្រៃសហគមន៍ ឧត្តមស្រែពស់ (ចំណុចខ្សាច់ស) ស្ថិតក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ក្នុងគោលបំណង ទាញរកប្រយោជន៍។
ប្រភពរាយការណ៍ថា ពេលក្រុមនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ ចុះទៅដល់ទីតាំងការដ្ឋានខាងលើនេះ បាននិយាយជាមួយម្ចាស់ការដ្ឋាននោះ ទារលុយជិត២០០០ដុល្លារអាមេរិក ជាថ្នូរនិងការមិនរាយការណ៍និងចុះចាប់បង្ក្រាប ដោយសង្ស័យទីតាំងជីកកាយបូមខ្សាច់ខាងលើនេះ គ្មានច្បាប់អនុញ្ញាត ហើយលួចជីកកាយបូមលាក់ពីជំនាញ និងអាជ្ញាធរពាក់
ព័ន្ធខាងលើ ។ ទោះជាមានករណីនេះកើតឡើង ប៉ុន្តែគេពុំដឹងថា, ម្ចាស់ទីតាំងឈ្មោះអ្វីនៅឡើយទេ ព្រោះការធ្វើអាជីវកម្មលួចលាក់ ច្រើនលាក់ៗមុខ។

ក្រោយពីមានការចរចាគ្នាពីសំណាក់ ម្ចាស់ទីតាំងនិងក្រុមនគរបាលប្រឆាំងបទល្មើសសេដ្ឋកិច្ចខេត្តកំពង់ស្ពឺ ដែលគេបង្ហើបថា មានឈ្មោះ ភាស់, ឈ្មោះធី, ឈ្មោះ ម៉ៅ និងឈ្មោះគុណ គឺក្រុមនគរបាលទាំងនោះ ព្រមយកលុយចំនួនលុយ១០៥០ដុល្លារសហរដ្ឋអាមេរិកវិញ ។ មិនតែប៉ុណ្ណោះ ការលួចជីកកាយបូមខ្សាច់របស់ម្ចាស់ការដ្ឋានសង្ស័យអត់ច្បាប់ទម្លាប់នេះ បានចំណាយលុយជាច្រើនទៅស្ថាប័ន ពាក់ព័ន្ធនានាលើកលែងតែគ្រូពេទ្យគ្រូបង្រៀន និងអាចារ្យវត្តតែប៉ុណ្ណោះ ទើបមិនបង់លុយឱ្យ ។ ដូច្នេះបើអោយលុយ ទៅច្រើនជំនាញ ប្រាកដណាស់ថាគ្មានច្បាប់។

ទោះជាយ៉ាងណាក៏ដោយ ប្រភពព័ត៌មានបានបន្ថែមទៀតថា ការដ្ឋានជីកកាយ បូមខ្សាច់មួយកន្លែងស្ថិតនៅក្នុងភូមិពោធិមាស ឬហៅថា ( ភូមិស្រែច្រាប ) ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បច្ចុប្បន្ននេះបានផ្អាកសកម្មភាពហើយ ដោយបែកធ្លាយរឿងលួចជីកកាយមិនសុំច្បាប់ទៅជំនាញមន្ទីររ៉ែនិងថាមពលក៏ដូចក៏ក្រសួងជាដើម ហើយអាជ្ញាធរក៏មិនសូវហ៊ានប្រថុយបិទភ្នែកតទៅទៀតដែរ។
តាមការបង្ហើបពីសមត្ថកិច្ចស្រុកឱរ៉ាល់ថា ម្ចាស់ការដ្ឋានជីកកាយ និងបូមខ្សាច់សង្ស័យអត់ច្បាប់នេះ មានឈ្មោះ ថៅកែហាប់ (ជាម្ចាស់ហាងភោជនីយដ្ឋានមួយកន្លែងខាងត្បូងរង្វង់មូលស្ពានដែក) ក្នុងភូមិច្រកទៀក ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
ការដ្ឋាននេះ ត្រូវបានប្រជាពលរដ្ឋដាក់ការសង្ស័យថា ក្រុមឈ្មួញធ្វើអាជីវកម្មគ្មានច្បាប់បណ្តាលឱ្យបាត់បង់ចំណូលពន្ធរដ្ឋដោយចោទប្រកាន់ថា មានការឃុបឃិតគ្នាជាប្រព័ន្ធតាមរយៈធ្វើមិនដឹងមិនឮរបស់អាជ្ញាធរស្រុកឱរ៉ាល់ និងមន្ត្រីជំនាញការិយាល័យរ៉ែ និងថាមពលស្រុកឱរ៉ាល់ ។ ការសង្ស័យរបស់ប្រជាពលរដ្ឋទៅលើអាជ្ញាធរស្រុកឱរ៉ាល់ លោកអភិបាលស្រុកវ័យក្មេងរូបនេះ និងការិយាល័យរ៉ែ និងថាមពលស្រុកឱរ៉ាល់នេះ ក្រោយពីមានមន្ត្រីជំនាញរ៉ែនិងថាមពលខេត្តកំពង់ស្ពឺដឹកនាំមន្ត្រីក្រោមឱវាទ សមត្ថកិច្ច និងអាជ្ញាធរភូមិចុះទៅពិនិត្យនិងធ្វើកំណត់ហេតុ ដល់ទីតាំងការដ្ឋានលួចជីកកាយបូមខ្សាច់នោះ ។

ពាក់ព័ន្ធក្នុងករណីនេះ នៅព្រឹកថ្ងៃទី៩ ខែធ្នូ ឆ្នាំ២០២២ មជ្ឈមណ្ឌលព័ត៌មាន “នគរវត្ត” មិនអាចធ្វើការទំនាក់ទំនងទៅម្ចាស់ទីតាំងដែលគេបង្ហើបថាឈ្មោះហាប់ បានទេដោយគ្មានលេខទូរសព្ទ ។ ដោយឡែកលោក ងួន វាសនា អភិបាលនៃគណៈអភិបាល ស្រុកឱរ៉ាល់ ខេត្តកំពង់ស្ពឺ ក៏មិនអាចសុំការបំភ្លឺបាន ខណៈទូរសព្ទចូលជាច្រើនដងគ្មានអ្នកទទួល។
ប្រភពខ្លះបានបង្ហើបថា, ការដ្ឋានបូមខ្សាច់នេះអាចនឹងបន្តដំណើរការ គ្រាន់តែរង់ចាំមើលប្រតិកម្មពីថ្នាក់លើឬមួយយ៉ាងណា ៕

...

ដោយ : សហការី

ចែករំលែក៖

នគរដ្រេហ្គន

ព័ត៌មានទាន់ហេតុការណ៍នៅកម្ពុជា