ភ្នំពេញ៖ ទីបំផុត​! ករណី​បាញ់រះនៅខណ្ឌចំការមន រងរបួសមនុស្ស៤នាក់​ កាលពី​យប់មិញ​នេះ​ កម្លាំងសមត្ថកិច្ច​នគរបាល​ខណ្ឌ​ចំការមន​ បានឃាត់ខ្លួន​មនុស្សចំនួន​ ៤នាក់យកមកសាកសួរ​ជុំវិញ​ហេតុការណ៍នេះហេីយ។​ ប៉ុន្តែ​សមត្ថកិច្ច​មិនទាន់​បានឆ្លេីយបំភ្លឺនៅឡេីយទេ​ គិត​ត្រឹម​រសៀល​ថ្ងៃ​ចន្ទ​ទី​១២​ ខែធ្នូ​នេះ។

សូមជម្រាបជូនថា​ ករណី​ហិង្សា​រវាង​ក្រុម​ក្មេង​ទំនើង​ពីរក្រុម​វាយគ្នារហូតផ្ទុះអាវុធនេះ​ បានកើតឡើងកាលវេលាម៉ោង ១រំលងអធ្រាត្រឈានចូលថ្ងៃទី១២ ខែធ្នូ ឆ្នាំ២០២២ នៅចំណុចមុខផ្ទះលេខ៤៧០ ផ្លូវព្រះមុន្នីវង្ស សង្កាត់ទន្លេបាសាក់ ខណ្ឌចំការមន។

មន្ត្រីជំនាញ​បានបញ្ជាក់ថា​ ជនរងគ្រោះទាំង៤នាក់នេះ៖​ ទី១៖ ឈ្មោះ ស៊ិន សុភ័ក្រ្ត អាយុ២២ឆ្នាំ មុខរបរបុគ្គលិកណេត (រងរបួសភ្លៅឆ្វេង និងត្រគៀក),​ ទី២៖ ឈ្មោះ មាស រ៉ាវីត អាយុ២០ឆ្នាំ មុខរបរ ដឹកទំនិញអនឡាញ (រងរបួសត្រគៀក)​ ,ទី៣៖ ឈ្មោះ ឃាង លីគាង អាយុ២២ឆ្នាំ មុខរបរ ដឹកទំនិញអនឡាញ (របួសកែងដៃឆ្វេង)​ និងទី៤៖ ឈ្មោះ ស្រឿន ប៉ោគីម អាយុ១៩ឆ្នាំ មុខរបរ ដឹកទំនិញអនឡាញ (រង​របួសខ្នងជើងឆ្វេង)។

តាមប្រភពព័ត៌មានពី​កន្លែង​កើត​ហេតុ​ បានឱ្យដឹងថា​ ជំហ៊ាន​ដំបូង​គេឃើញ​ថា ក្រុមជនរងគ្រោះ និងមិត្តភក្តិ បានជិះម៉ូតូចេញពីម្តុំវត្តពោធិ៍ញាណ បត់ឡើងផ្លូវ៣៧១ ហើយប្រុងទៅប៉ះម៉ូតូម៉ាក NC700 ពណ៌ក្រហម ដែលកំពុងបើកបរដោយឈ្មោះ ខា សុខឃី អាយុ៤១ឆ្នាំ មុខរបរអ្នកសារព័ត៌មានអាស៊ានដេលី ឌុបមនុស្សប្រុសម្នាក់ទៀតឈ្មោះ រៀន រិទ្ធិ អាយុ៣៣ឆ្នាំ ហើយភាគីទាំងសងខាង បានឌឺដងដាក់គ្នា រួចបើកម៉ូតូដេញតាមគ្នាចុះឡើង រហូតដល់ក្បាលថ្នល់ (ចំណុចកើតហេតុ) ឈ្មោះ ខា សុខឃី បានឈប់ម៉ូតូនៅទីនោះជួបជាមួយបុរសម្នាក់មិនស្គាល់ឈ្មោះ (អ្នកផ្ទុះអាវុធ) ហើយក្រុមជនរងគ្រោះក៏ជិះម៉ូតូផុតទៅ។

ប្រភពដដែលបន្តថា​ ស្រាប់តែបន្តិចក្រោយមកភាគីដែលរងគ្រោះ បាននាំគ្នាជិះម៉ូតូត្រឡប់មកវិញ ហើយយកដុំថ្មគប់មកលើគូបក្ខដិបក្ខ ឃើញដូច្នេះមនុស្សប្រុសម្នាក់ដែលមិនស្គាល់ឈ្មោះបានដកអាវុធខ្លី មិនស្គាល់ម៉ាក បាញ់ទៅលើក្រុមជនរងគ្រោះបណ្តាលឲ្យរងរបួស ហើយត្រូវបានបញ្ជូនទៅព្យាបាលរបួសនៅពេទ្យរុស្សី ចំណែកអ្នកផ្ទុះអាវុធបានឡើងជិះរថយន្តម៉ាកព្រូស ពណ៌ខ្មៅ មិនស្គាល់ស្លាកលេខ គេចចេញទៅបាត់។

ក្រោយកើតហេតុកម្លាំងសមត្ថកិច្ចចម្រុះ​ បានចុះមកកន្លែងកេីតហេតុរកឃើញសំបកគ្រាប់ចំនួន៨សំបក និងក្បាលគ្រាប់ចំនួន១គ្រាប់ បន្សល់ទុកនៅកន្លែង​ និងបានហៅឈ្មោះ ខា សុខឃី និងឈ្មោះ រៀន រិទ្ធិ មកសាកសួរ តែពួកគាត់ឆ្លើយថា មិនស្គាល់អ្នកផ្ទុះអាវុធទេ គឺពេលកើតហេតុនោះ គាត់មកឈប់កន្លែងកើតហេតុដើម្បីរកនគរបាលឲ្យជួយ។

គួរបញ្ជាក់ថា​ ឈ្មោះ ខា សុខឃី និងឈ្មោះ រៀន រិទ្ធិ ត្រូវបាននគរបាលឃាត់សួរនាំ ដើម្បីធ្វើការស្រាវជ្រាវសិន ហើយក៏បានឃាត់បក្ខពួកជនរងគ្រោះ២នាក់ទៀត ដែលបានយកដុំថ្មគប់មកលើគេរួមមាន៖​ ទី១៖ ឈ្មោះ រី សុខជា អាយុ២៣ឆ្នាំ មុខរបរ ដឹកទំនិញអនឡាញ​ និងទី២៖ ឈ្មោះ ខៀវ ឧត្តមប៊ុនម៉ា អាយុ២២ឆ្នាំ មុខរបរ ដឹកទំនិញអនឡាញ។

ជាមួយគ្នានោះ កម្លាំងនគរបាល​ ក៏បានដកហូតបានម៉ូតូ២គ្រឿង ម៉ាកហុងស្គុបពី ពណ៌ស១គ្រឿង ពាក់ស្លាកលេខភ្នំពេញ 1IJ-5653 ជារបស់អ្នករបួស និងម៉ូតូ១គ្រឿងម៉ាក NC700 ពណ៌ក្រហម ពាក់ស្លាកលេខភ្នំពេញ 1JR-9080 ជារបស់អ្នកសារព័ត៌មានឃាត់សាកសួរនាំនៅអធិការដ្ឋានខណ្ឌបណ្ដោះអាសន្ន ហើយចំណែកម៉ូតូ២គ្រឿងទៀតនៅកងរាជអាវុធហត្ថខណ្ឌរក្សាទុកផងដែរ៕ ដោយ៖ ជីណា