ភ្នំពេញ៖ លោកស្រីឧបនាយករដ្ឋមន្រ្តី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីសំណេះសំណាល និងពិសារអាហារសាមគ្គីជាមួយក្រុមសកម្មជននារីសហភាពសហព័ន្ធយុវជនរាជធានីភ្នំពេញ នៅមជ្ឈមណ្ឌលម៉ូឌែន២ នាល្ងាចថ្ងៃទី០១ ខែមិថុនាឆ្នាំ២០១៦ រាជធានីភ្នំពេញ។

លោកស្រីក៏បានមានប្រសាសន៍ថា ៖ ពិធីដែលបានរៀបចំនៅពេលនះ គឺជាការចែករំលែកបទពិសោធន៍ ព័ត៌មាន និងបង្កើនការយល់ដឹងពីតួនាទីរបស់ស្រ្តីក្នុងការចូលរួមកសាងអភិវឌ្ឍន៍សង្គមជាតិ និងជាឱកាសដ៏ល្អក្នុងការលើកទឹកចិត្តដល់ស្ត្រីដែលបានលះបង់គ្រប់បែបយ៉ាង ក្នុងការបំពេញភារកិច្ចដោយមិនខ្លាចការលំបាកនឿយហត់ដើម្បីវឌ្ឍនៈភាពសង្គមហើយក៏ស្ត្រីបានដើរតួនាទីយ៉ាងសំខាន់ក្នុងការទទួលខុសត្រូវទាំងក្នុងគ្រួសារនិងក្នុងការងារស្ថាប័នរដ្ឋ។

លោកស្រីក៏បានបន្តទៀតថា យុទ្ធសាស្រ្តចតុកោណដំណាក់កាលទី៣ គឺរាជរដ្ឋាភិបាលបានជម្រុញ និងអនុវត្តគោលនយោបាយលើកកម្ពស់យែនឌ័រ តាមរយៈ ការអភិវឌ្ឍសមត្ថភាពចំណេះដឹង និងជំនាញវិជ្ជាជីវៈ ការពង្រីកលទ្ធភាពស្ត្រី និងកុមារនៅជនបទឲ្យទទួលបានឱកាសចូលរៀននៅគ្រប់កម្រិត ការទទួលបាននូវការការពារខាងផ្លូវច្បាប់និងការយកចិត្តទុកដាក់ក្នុងការតម្លើងឋានៈតួនាទីរបស់ស្រ្តីតាំងពីថ្នាក់ជាតិរហូតដល់ថ្នាក់ក្រោមជាតិ៕

ដោយ៖ សុវណ្ណារ៉ា