ខេត្តព្រះវិហារ៖ បុរសជនជាតិខ្មែរម្នាក់ ត្រូវបានបុរសជនជាតិចិននិងស្ត្រីជនជាតិថៃប្រើល្បិចជួលរថយន្តជិះពីខេត្តសៀមរាបទៅខេត្តស្ទឹងត្រែងក្នុងតម្លៃ២០០ដុល្លារ។ លុះធ្វើដំណើរទៅដល់ស្រុកឆែប ខេត្តព្រះវិហារ ជនជាតិចិនរូបនោះក៏ដកកាំភ្លើងខ្លីភ្ជង់ម្ចាស់រថយន្តហើយបើកគេចខ្លួនបាត់ដោយសុវត្ថិភាព។ហេតុការណ៍នេះបានកើតឡើងកាលពីវេលាម៉ោង១២និង២៤នាទី ថ្ងៃទី​១៥ ខែ​ធ្នូ​ ឆ្នាំ​២០២២​ នៅចំណុចព្រៃទទឹង ក្នុងភូមិឆែបកើត ឃុំឆែបមួយ ស្រុកឆែប ខេត្តព្រះវិហារ។

    លោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប ខេត្តព្រះវិហារ បានថ្លែងប្រាប់ឱ្យដឹងថា មុនពេលកើតហេតុ បុរសជាជនជាតិចិនម្នាក់និងនារីជាជនជាតិថៃម្នាក់បានជួល​រថយន្តពីខេត្តសៀមរាប​ទៅខេត្តស្ទឹងត្រែងក្នុងតម្លៃ​ ២០០ដុល្លារ។ បន្ទាប់ពីព្រមព្រៀងគ្នាហើយក៏ធ្វើដំណើរមកដល់ចំណុចព្រៃទទឹង ក្នុងភូមិសាស្ត្រភូមិឆែបកើត ឃុំឆែបមួយ ស្រុកឆែប ខេត្តព្រះវិហារ បុរសជាម្ចាស់រថយន្តក៏ឈប់រថយន្តដើម្បីចាក់ទឹក ។ បន្ទាប់ពីចាក់ទឹករថយន្តរួចហើយបម្រុងឡើងបើករថយន្តបន្តដំណើរទៅមុខទៀត ស្រាប់តែបុរសជាជនជាតិចិនបានដកកាំភ្លើងខ្លីភ្ជង់ចង្កេះម្ចាស់រថយន្ត និងបញ្ជានៅឱ្យឆ្ងាយពីរថយន្ត ហើយជនសង្ស័យទាំងពីរនាក់នេះក៏បានបើករថយន្តត្រឡប់ក្រោយវិញដោយសុវត្ថិភាព។

    លោកអធិការស្រុកឆែបបានបញ្ជាក់ឱ្យដឹងទៀតថា៖ ម្ចាស់​រថយន្ត​ជាជនរងគ្រោះមានឈ្មោះ​ អឿន​ សង់​ ភេទ​ប្រុស​ អាយុ​២៥ឆ្នាំ​ មុខរបរ​រត់តាក់ស៊ី​ រស់នៅ​ភូមិ​បុរីអូរស្វាយ​ ឃុំ​បុរីអូស្វាយ​ ស្រុក​បុរី​អូរស្វាយ​សែន​ជ័យ​ ខេត្តស្ទឹងត្រែង​។ សម្ភារដែលបាត់បង់​រួមមាន​ រថយន្ត​ម៉ាក​ Starix ពណ៌​ទឹកប្រាក់​១គ្រឿង​ ពាក់ស្លាកលេខ 2BJ-1101  លុយ​ ១,៥០០ដុល្លារ លុយខ្មែរ​ ៣០០,០០០ រៀល ឯកសារ​រថយន្ត​  និង​អត្តសញ្ញាណ​ប័ណ្ណ​សញ្ជាតិ​ខ្មែរ​ ១សន្លឹក​។

   លោក ឈួរ ម៉ាឌី បានថ្លែងប្រាប់ទៀតថា    ករណីនេះបើម្ចាស់រថយន្តរងគ្រោះ ក្រោយពីហេតុការណ៍កើតឡើងភ្លាមៗរាយការណ៍មកសមត្ថកិច្ចជនសង្ស័យទាំង២នេះមិនអាចបើករថយន្តគេចរួចពីភូមិសាស្ត្រខេត្តព្រះវិហារបានទេ តែក្រោយហេតុការណ៍កើតឡើងជនរងគ្រោះបានទាក់ទងទៅក្រុមគ្រួសារ ទម្រាំបានមកដាក់ពាក្យប្តឹងនៅសមត្ថកិច្ចគឺប្រើរយៈពេលជាង២ម៉ោង ជាហេតុធ្វើឱ្យជនសង្ស័យអាចបើករថយន្តចេញពីទឹកដីខេត្តព្រះវិហារបាន។ ប៉ុន្តែទោះយ៉ាងណាសមត្ថកិច្ចកំពុងធ្វើការស្រាវជ្រាវករណីនេះយ៉ាងយកចិត្តទុកដាក់ ក្រោមបទបញ្ជានិងការណែនាំពីលោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ ដើម្បីបង្រ្កាបករណីនេះ៕