ខេត្តបន្ទាយមានជ័យ៖ លោក អ៊ុំ រាត្រី អភិបាល​នៃគណៈអភិបាលខេត្ដបន្ទាយមានជ័យ​ បានថ្លែង​ឱ្យ​ដឹង​នៅព្រឹក​ថ្ងៃ​ព្រហស្បតិ៍​ទី​២៩​ ខែធ្នូ​ ឆ្នាំ​២០២២នេះថា៖​ ករណី​គ្រោះ​អគ្គិភ័យ​មួយបានវាយប្រហារអគារកាស៉ីណូយីហោ”ហ្រ្គេនដាយមិន” ​បណ្ដាលឱ្យ​មនុស្ស​យ៉ាងហោចណាស់​ចំនួន​ ១១នាក់បា​នស្លាប់ និងជាង៣០នាក់ទៀតបានរងរបួស​ នេះបេី​គិតត្រឹម​វេលាម៉ោង​ជាង១១ព្រឹក​នេះ!

លោក អ៊ុំ រាត្រី បានថ្លែង​បន្តថា​ គ្រាដែលអគ្គិភ័យអាចគ្រប់គ្រងបានទាំងស្រុងនេះ ប្រតិបត្តិការរបស់កម្លាំងសមត្ថកិច្ចមិនទាន់ត្រូវបានបិទបញ្ចប់នៅឡើយទេ ពោលនៅពេលនេះកម្លាំងសមត្ថកិច្ចទាំងអស់ កំពុងរួមដៃគ្នាដើម្បីស្រាវជ្រាវរុករកជនរងគ្រោះដែលបានជាប់គាំង នៅក្នុងអគារនៅពេលដែលភ្លើងកំពុងឆេះ។

លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានបញ្ជាក់ថា​ យោងតាមរបាយការណ៍បន្ថែមនៅវេលាម៉ោងជាង១១ព្រឹកថ្ងៃទី២៩ ខែធ្នូ ឆ្នាំ២០២២នេះ ករណីអគ្គិភ័យវាយប្រហារអគារកាស៉ីណូ”ហ្រ្គេនដាយមិន” ស្ថិតក្នុងភូមិប៉ោយប៉ែត សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យនេះ គឺមានបុគ្គលិកបម្រើការប្រុសស្រីប្រហែលជាង៤០០នាក់​ ប៉ុន្តែការខូចខាតយ៉ាងណានោះ មិនទាន់អាចវាយតម្លៃបាននៅឡើយទេ។​ ខណៈ​កម្លាំងសមត្ថកិច្ចអាចគ្រប់គ្រងបានទាំងស្រុងហើយ។​

សូមបញ្ជាក់ថា អគ្គិភ័យនេះ បានកើតមានតាំងពីវេលាម៉ោង ១១៖៣០នាទីយប់ថ្ងៃទី២៨ ខែធ្នូ ឆ្នាំ២០២២ ខណៈមូលហេតុ ត្រូវបានគេរាយការណ៍ជំហ៊ានដំបូងថា ឆ្លងចរន្ដអគ្គិសនីនៅទីតាំងហ្គេមជាន់ក្រោម ហើយបានរីករាលដាលតែម្ដង។

ប្រតិបត្តិការនៅកន្លែងកើតហេតុ ធ្វើឡើងដោយកម្លាំងរបស់គណៈកម្មាធិការជាតិគ្រប់គ្រងគ្រោះមហន្ដរាយ សហការជាមួយកងប្រតិបត្តិការរុករក និងសង្គ្រោះ ៧១១ នៃកងពលតូចលេខ៧០, កម្លាំងអាជ្ញាធរខេត្តមាន នគរបាល អាវុធហត្ថ និងយោធា ព្រមទាំងមានការចូលរួមពីកងកម្លាំងសមត្ថកិច្ចរបស់ថៃផងដែរ។

ដោយ​ឡែកនៅព្រឹកថ្ងៃទី២៩ ខែធ្នូ ឆ្នាំ២០២២នេះដែរ​ ​សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានដឹកនាំ​កម្លាំងអន្ដរាគមន៍ចុះដោយផ្ទាល់ នៅទីតាំងកាស៊ីណូហ្រ្គេនដាយមិននេះផងដែរ៕

ដោយ​៖វណ្ណា