អំពើហិង្សានៅតាមដងផ្លូវថ្មីបំផុតកំពុងតែធ្វើឲ្យប្រទេសនេះធ្លាក់ជ្រៅក្នុងវិបត្តិពិបាកក្នុងការដោះស្រាយ។ កម្លាំងសន្តិសុខវេណេហ្ស៊ូអេឡាបានបាញ់ឧស្មាន់បង្ហូទឹកភ្នែក បំបែកហ្វូងបាតុករដែលស្រែកខ្លាំងៗនៅមុខវិមានប្រធានាធិបតីថាកាលពីថ្ងៃទី២ ខែមិថុនា ថា «យើងត្រូវការអាហារ»។
ពលរដ្ឋវេណេហ្ស៊ូអេឡា រាប់សិបពាន់នាក់បង្ហាញការខកចិត្ត ខឹងសម្បារយ៉ាងខ្លាំងចំពោះរដ្ឋាភិបាលទីក្រុង Caracas ដើម្បីធ្វើបាតុកម្មប្រឆាំងនិងការដឹកនាំបង្ករឲ្យមានវិបត្តិនៅក្នុងប្រទេស។
ប្រធានាធិបតីវេណេហ្ស៊ូអេឡា លោក Nicolas Maduro កំពុងរងសម្ពាធយ៉ាងខ្លាំងពីវិបត្តិសេដ្ឋកិច្ចកាន់តែខ្លាំងឡើងពីមួយថ្ងៃទៅមួយថ្ងៃក្នុងប្រទេសដែលមានពលរដ្ឋ៣០លាននាក់។
វ៉េណេស៊ុយអេឡា ជាប្រទេសធ្លាប់មានបាននិងកំរិតជីវភាពរស់នៅរបស់ប្រជាជនយ៉ាងប្រសើរនៅក្នុងទសវត្សរ៍ទី៦០ ប្រហាក់ប្រហែលទៅនឹងប្រទេសលោកខាងលិចផ្សេងៗទៀត ព្រោះជាប្រទេសសម្បូរប្រេងកាត។ ប៉ុន្តែពេលនេះវ៉េណេស៊ុយអេឡា ធ្លាក់ខ្លួនជាប្រទេសក្រីក្រដ៏ខ្លាំងបំផុតមួយនៅតំបន់អាមេរិកឡាទីន និងនៅលើពិភពលោក ដោយមានពលរដ្ឋ ៧៣ភាគរយរស់នៅក្រោមបន្ទាត់នៃភាពក្រីក្រ។
ផលិតផលក្នុងស្រុកដាំក្បាលចុះជាប់ជាប្រចាំតាំងពីជាង២ឆ្នាំមកហើយ។ ឱនភាពជាតិ មានកំរិតដល់ទៅ ២៧៥ភាគរយ នៅឆ្នាំ២០១៥ និងធ្លាក់ដល់ ៧០០ភាគរយនៅឆ្នាំ២០១៦ ពោលគឺជាជើងឯកប្រចាំភពផែនដី។ ការធ្លាក់ចុះនេះបណ្តាលមកពីមូលហេតុពីរសំខាន់ៗ ទីមួយគឺនយោបាយរំពឹងលើធនធានប្រេង និងទីពីរនយោបាយបែបសង្គមនិយមរបស់វ៉េណេស៊ុយអេឡា។
វ៉េណេស៊ុយអេឡា គឺជាតំណាងប្រទេសសង្គមនិយមដ៏ធំបំផុតប្រចាំសតវត្សរ៍ទី២១ នេះ។ សេដ្ឋកិច្ចសង្គមនិយម ប្រមូលដាក់ជាសមូហភាព រដ្ឋគ្រប់គ្រងរាល់គ្រប់ក្រុមហ៊ុនសហគ្រាស តូចធំ ទីផ្សារហិរញ្ញវត្ថុ ទីផ្សារទំនិញ មន្ទីរពេទ្យ សូម្បីតែអំណាចតុលាការក៏ត្រូវស្ថិតក្រោមបង្គាប់នយោបាយដែរ។ រដ្ឋាភិបាលត្រួតពិនិត្យគ្រប់យ៉ាងទាំងអស់គ្មានអ្វីជារបស់ឯកជនទេ និងគ្មានទេពាក្យថាសេរីភាព។ រដ្ឋជាអ្នកចែកចាយទឹក ភ្លើង ចំណីអាហារ សម្ភារៈប្រើប្រាស់ ផលិតផលកសិកម្មយ៉ាងខ្ជះខ្ជាយ។
នយោបាយសង្គមនិយមនេះត្រូវបានស្តារនិងអនុវត្តន៍តាំងពីឆ្នាំ១៩៩៩ មក ដោយប្រធានាធិបតី អ៊ុយហ្កោ ស្ហាវែស។ របបនយោបាយបែបនេះ បានធ្វើឱ្យមានអំពើពុករលួយស៊ីរ៉ូងផ្ទៃក្នុងនៅពេលធនធានប្រេងកាតដែលជាដង្ហើមសេដ្ឋកិច្ចរបស់ប្រទេសឡើងថ្លៃ លុយធ្លាក់ចូលក្នុងហោបៅថ្នាក់ដឹកនាំ (កូនស្រីស្ហាវែស គឺកំពូលអ្នកមានបំផុតមួយនៅលើពិភពលោក)។ លុយចំណេញបានមកពីការលក់ប្រេង មិនអាចទាំងសងបំណុលជាតិគ្រប់ផង។
នៅពេលប្រធានាធិបតី ស្ហាវែស ស្លាប់នៅឆ្នាំ២០១៣ លោក នីកូឡា ម៉ាឌុយរ៉ូ បានឡើងបន្តតំណែង និងបន្តនយោបាយសេដ្ឋកិច្ចបែបសង្គមនិយមគ្មានចាត់វិធានការអ្វីទាំងអស់លុះតម្លៃប្រេងធ្លាក់ថ្លៃសេដ្ឋកិច្ចត្រដរខ្យល់ភ្លាម។
ពេលនេះក្រៅអំពីវិបត្តិនយោបាយជម្លោះរវាងរដ្ឋាភិបាលនិងសភាដ៏តានតឹងប្រជាពលរដ្ឋវិញកំពុងត្រដាបត្រដួសខ្វះទឹក ខ្វះភ្លើង ប្រើប្រាស់ មានលុយហើយមិនអាចទិញសម្ភារៈម្ហូបអាហារចាំបាច់សម្រាប់រស់បានផង ព្រោះគ្មានរបស់លក់ និងដោយសារការប្រើប្រព័ន្ធផ្តិតក្រយៅដៃ ពលរដ្ឋវ៉េណេស៊ុយអេឡាអាចទិញចំណីអាហារបានស្តុកទុកបានត្រឹមពីរសប្តាហ៍ប៉ុណ្ណោះ។ តាំងពីខែមេសា មក ភាពអត់ឃ្លានបានរុញច្រានឱ្យមានការលួច ប្លន់ បំផ្លិចបំផ្លាញគ្រប់បែបយ៉ាងតាមហាងទំនិញ តាមរថយន្តដឹកជំទិញ ស្ទើរពេញផ្ទៃប្រទេស៕
ប្រែសម្រួល៖ សាធី
