ខេត្តស្វាយរៀង៖ បុរសម្នាក់ស្លាប់និងរងរបួសធ្ងន់ម្នាក់ដោយសាករណីគ្រោះថ្នាក់ចរាចរណ៍គួរឲ្យរន្ធត់រវាងម៉ូតូម៉ាកហុងដាសេ១២៥ សេរី២០១៣ ប្រលះនិងម៉ូតូម៉ាកវ៉េវអាល់ហ្វាបើកបញ្រ្ចាស់ទិសគ្នាលើផ្លូវជាតិលេខ១ កាលពីវេលាម៉ោង៩និង១០នាទីយប់ថ្ងៃទី៣ ខែមិថុនាឆ្នាំ ២០១៦នៅចំណុចភូមិតាប៉ ឃុំតាសួស ស្រុកស្វាយជ្រំ ខេត្តស្វាយរៀង។

សមត្ថកិច្ចនគរបាលស្រុកស្វាយជ្រំបានឲ្យដឹងថា បុរសដែលស្លាប់មានឈ្មោះ សៅ  វ៉ាត អាយុ៥០ឆ្នាំ មុខរបរកសិកររស់នៅភូមិមេភ្លើង សង្កាត់ស្វាយរៀង ក្រុងស្វាយរៀង ខណៈជិះម៉ូតូម៉ាក សេ១២៥ សេរី២០១៣ ពណ៌ខ្មៅ ពាក់ស្លាកលេខ ស្វាយរៀង 1B-1963 ខូចខាតយ៉ាងដំណំ។ ចំពោះអ្នករងរបួសធ្ងន់មានឈ្មោះ វ៉ាត ឡុង អាយុ៣១ឆ្នាំមុខរបរកម្មកររោងចក្រ រស់នៅភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង។

តាមសាក្សីនៅកន្លែងកើតហេតុឲ្យដឹងថា មុនពេលកើតហេតុមានម៉ូតូម៉ាក សេ១២៥ សេរី២០១៣ ពណ៌ខ្មៅ ពាក់ស្លាកលេខ ស្វាយរៀង 1B-1963 បើកបរដោយឈ្មោះ សៅ  វ៉ាត ដោយធ្វើដំណើរពីលិចទៅកើតក្នុងល្បឿនលឿនលើកំណាត់ផ្លូវជាតិលេខ១ ក៏បុកនិងម៉ូតូម៉ាកវ៉េវអាល់ហ្វា ពណ៌ខ្មៅ ពាក់ស្លាកលេខស្វាយរៀង 2E-7236 បើកបរដោយឈ្មោះ វ៉ាត ឡុង ដែលបើកបញ្រ្ចាស់ទិសគ្នាយ៉ាងពេញទំហឹងលាន់សូរដូចរន្ទះបាញ់តែម្ដង។

ក្រោយកើតហេតុប្រជាពលរដ្ឋរាយការណ៍មកសមត្ថកិច្ចនគរបាលមូលដ្ឋានមកអន្តរាគមន៍ជួយសងគ្រោះ ប៉ុន្តែអកុសសដោយ សៅ  វ៉ាត រងរបួសធ្ងន់ក៏ដាច់ខ្យល់ស្លាប់បាត់ទៅហើយ រីឯអ្នករបួសធ្ងន់ត្រូវបានបញ្ជូនមកមន្ទីរពេទ្យខេត្តស្វាយរៀង។

ចំពោះម៉ូតូទាំង២គ្រឿងត្រូវបាននគរបាលយកទៅរក្សាទុកនៅអធិការដ្ឋាននគបាលស្រុកស្វាយជ្រំ ដើម្បីដោះស្រាយនាពេលក្រោយ។ បច្ចុប្បន្នសាកសពសមត្ថកិច្ចនគរបាលបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

ដោយ៖ យឹម សុថាន