អន្តរជាតិ៖ រដ្ឋមន្ត្រីថាមពលរបស់ ទួរគី លោក Fatih Dönmez បាននិយាយថា ទីក្រុងអង់ការ៉ា កំពុងពិភាក្សាជាមួយទីក្រុងមូស្គូ លើការពន្យារពេលការទូទាត់សម្រាប់កិច្ចសន្យាឧស្ម័នធម្មជាតិ។ នេះបេីយោងតាមការចេញផ្សាយរបស់ទីភ្នាក់ងារសារព័ត៌មាន RT នៅព្រឹកថ្ងៃអាទិត្យទី០៨ ខែមករា ឆ្នាំ២០២៣។
លោករដ្ឋមន្ត្រីបាននិយាយថា៖ “កិច្ចសន្យាដែលបានបញ្ចប់ពីមុនជាមួយរុស្ស៊ីនៅតែជាធរមាន យើងកំពុងចរចាជាមួយរុស្ស៊ីពីទិដ្ឋភាពផ្សេងៗ។ យើងកំពុងពិភាក្សាអំពីបញ្ហាជាច្រើននៅពេលនេះ រួមទាំងការពន្យារពេលការទូទាត់” ។
លោក Dönmez បានបន្ថែមថា សុវត្ថិភាពផ្គត់ផ្គង់ និងការបន្តគឺបច្ចុប្បន្នជាបញ្ហាសំខាន់បំផុត។ លោកបាននិយាយថា៖ «រហូតមកដល់ពេលនេះយើងមិនមានបញ្ហាអ្វីជាមួយរុស្ស៊ីទេ។
មុននេះប្រធានាធិបតីទួរគីលោក Recep Tayyip Erdogan បានពិភាក្សាអំពីគម្រោងមជ្ឈមណ្ឌលឧស្ម័ននៅក្នុងការសន្ទនាតាមទូរស័ព្ទជាមួយប្រធានាធិបតីរុស្ស៊ីលោក Vladimir Putin ។ ក្នុងអំឡុងកិច្ចពិភាក្សា លោក Erdogan បានធានាចំពោះលោក Putinថា ទីក្រុងអង់ការ៉ាបានពង្រឹងនិងបន្តពង្រឹងហេដ្ឋារចនាសម្ព័ន្ធថាមពលដែលចាំបាច់សម្រាប់ការបង្កើតមជ្ឈមណ្ឌលឧស្ម័ន៕ដោយស តារា
ប្រភព៖RT
