ភ្នំពេញ​ ៖​ ខណៈមេឃកំពុងតែភ្លៀង​ មាននារីម្នាក់បានបើករថយន្តស៊េរីទំនើបម៉ាកMG មួយគ្រឿងខ្វះការប្រុងប្រយ័ត្ន​បានរេចង្កូតទៅបុកសួនច្បារពុះចែកទ្រូងផ្លូវបណ្ដាលឱ្យរងការខូចខាតអស់ជាច្រើនម៉ែត្រ រីឯរថយន្តកល់ជាប់ទៅមុខលែងរួច។
​    ហេតុការណ៍នេះបានកើតឡើងកាលពីវេលាម៉ោង ១១ យប់ថ្ងៃទី១០ ខែមករា ឆ្នាំ២០២៣ នៅតាមបណ្ដោយផ្លូវR5 ក្នុងបរិវេណបឹងកក់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
​    បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញនារីម្នាក់បើករថយន្តស៊េរីទំនេីបម៉ាកMG​ មួយគ្រឿង​ ពណ៌ស​ ពាក់ផ្លាកលេខភ្នំពេញ2BP-8996 ធ្វើដំណើរពីកើតទៅលិច លុះមកដល់ចំណុចកើតហេតុខាងលើ​ ដោយទំនងផ្លូវកោងផង​ និងមេឃកំពុងភ្លៀងផងក៏រេចង្កូតទៅបុកសួនពុះចែកទ្រូងផ្លូវបណ្ដាលឱ្យខូចខាតអស់ប្រហែល៤ម៉ែត្រ ចំណែករថយន្តកល់ជាប់លើទ្រូងផ្លូវរងការខូចខាត​ និងទៅមុខលែងរួច។
​     ក្រោយកើតហេតុ​ សន្តិសុខក្រុមហ៊ុនបានចុះមកដល់ និងមានតំណាងខាងភាគីរថយន្តបង្កចុះមកដល់កន្លែងកើតហេតុធ្វើការសម្របសម្រួលគ្នាជាមួយខាងភាគីក្រុមហ៊ុន ។ បន្ទាប់មកភាគីទាំងសងខាងបានព្រមព្រៀងគ្នាដោយខាងភាគីរថយន្តបានចេញសំណងថ្លៃការខូចខាតទៅឲ្យខាងភាគីក្រុមហ៊ុនដើម្បីបញ្ចប់រឿងនៅនឹងកន្លែងកើតហេតុ រួចក៏ហៅរថយន្តមកស្ទូចចេញពីទ្រូងផ្លូវ ហើយបើករថយន្តទាំងបែកកង់ខាងឆ្វេងបន្តដំណើរទៅមុខបាត់​ទៅ៕

ដោយ៖ ភារ៉ាដង្កោ