ខេត្តកំពង់ឆ្នាំង ៖ បុរសជនជាតិវៀតណាមម្នាក់ត្រូវបានសមត្ថកិច្ចនគរបាលក្រុងកំពង់ឆ្នាំង ធ្វើការឃាត់ខ្លួនពាក់ព័ន្ធនិងការប្រើប្រាស់ និងចែកចាយគ្រឿងញៀន ករណីនេះត្រូវឃាត់ខ្លួនកាលពីវេលាម៉ោងជិត៧យប់ថ្ងៃទី៤ ខែមិថុនា ឆ្នាំ២០១៦ នៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ។
សមត្ថកិច្ចបានឲ្យដឹងថា ជនសង្ស័យដែលធ្វើការឃាត់ខ្លួននេះមានឈ្មោះ កាត់ វ៉ាន់រឿន ភេទប្រុស អាយុ២៧ឆ្នាំ ជាជនជាតិវៀតណាម ស្នាក់នៅក្នុងភូមិ-ឃុំកើតហេតុខាងលើ ។
សមត្ថកិច្ចបានឲ្យដឹងថា នៅមុនពេលចាប់ខ្លួនជនសង្ស័យ គឺមានប្រជាពលរដ្ឋបានរាយការណ៍អំពីសកម្មភាពរបស់ជនសង្ស័យដែលប្រើប្រាស់ និងចែកចាយសារធាតុញៀននៅកន្លែងស្នាក់នៅ ក្រោយពីទទួលព័ត៌មាននេះសមត្ថកិច្ចបានដាក់កម្លាំងតាមដាន និងបានឃើញជនសង្ស័យបានរៀបចំធ្វើសកម្មភាពប្រើប្រាស់សារធាតុញៀន ហើយបានធ្វើការឃាត់ខ្លួនតែម្តង ។ ក្នុងពេលឃាត់ខ្លួនសមត្ថកិច្ចបានដកហូតទូរស័ព្ទ១គ្រឿង លុយដុង១២,០០០ដុង ប្រាក់រៀលជាង៤ម៉ឺនរៀល និងឧបករណ៍សម្រាប់សេពគ្រឿងញៀនមួយចំនួនផងដែរ ចំណែកឯសារធាតុញៀនត្រូវបានជនសង្ស័យបំផ្លាញចោលមុនពេលសមត្ថកិច្ចចូលទៅដល់ ។
ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការដើម្បីចាត់ការបន្តតាមនីតិវិធី ៕
ដោយ៖ ចន្ថា
