ខេត្តកំពង់ឆ្នាំង ៖ រន្ទះបាញ់បានផ្តាច់សង្ខាបុរសម្នាក់ អោយព្រាត់ពីកូន និងប្រពន្ធ តែមួយពព្រិចភ្នែក ក្នុងពេលដែលភ្លៀងមេធំលាយឡំនិងផ្គរន្ទះ បាញ់ត្រូវឪពុកអោយស្លាប់ភ្លាមៗនៅនិងកន្លែង ដែលហេតុការណ៍នេះបានកើតឡើងកាលពីវេលាម៉ោងប្រមាណជា៧និង៣០នាទីយប់ ថ្ងៃទី៥ ខែមិថុនា ឆ្នាំ២០១៦នៅភូមិកណ្តាល ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង។
សមត្ថកិច្ចមូលដ្ឋានបានអោយដឹងថា បុរសរងគ្រោះដែលស្លាប់ដោយសាររន្ទះបាញ់នេះ មានឈ្មោះសេង សៀង អាយុ៣៩ឆ្នាំ មានប្រពន្ធនិងមានកូន២នាក់ ។
ប្រជាពលរដ្ឋនៅកន្លែងកើតហេតុបានអោយដឹងថា នៅមុនពេលកើតហេតុ នៅមូលដ្ឋាន មានភ្លៀងមួយមេយ៉ាងខ្លាំង លាយឡំជាមួយនិងផ្គរន្ទះផង ឃើញដូចនេះកូនរបស់បុរសរងគ្រោះបានរត់ឡើងទៅលើផ្ទះ ចំណែកឯជនរងគ្រោះបានអង្គុយលើគ្រែនៅក្រោមផ្ទះ ក្នុងពេលដែលកំពុងអង្គុយ ក៍ស្រាប់តែមានរន្ទះផ្កាភ្លើងនិងមានសម្លេងមួយយ៉ាងខ្លាំង បាញ់ចូលមកផ្ទះជនរងគ្រោះ ។ ក្រោយពីរន្ទះបានស្ងប់ទៅក៍ឃើញជនរងគ្រោះស្លាប់បាត់បង់ជីវិតទៅបាត់ទៅហើយ ក្រុមគ្រួសារបានហៅអ្នកជិតខាង និង រាយការណ៍ទៅសមត្ថកិច្ច អោយជួយពិនិត្យមើលផងដែរ ។
ដោយ៖ ចន្ថា
