ភ្នំពេញ៖ នារីជនជាតិចិនម្នាក់ បានបើករថយន្ដសេរីទំនើបម៉ាកJAGUAR ទៅបុករនាំងដែកពុះចែកទ្រូងផ្លូវចំនួន៤ផ្ទាំងបានរងការខូចខាតបាក់រៀបដល់ដី ចំណែករថយន្ដបង្កដាច់ការឡេខាងមុខទៅមុខលែងរួច តែមិនបណ្ដាលឲ្យមានអ្នករងរបួសនោះទេ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង២២និង០០នាទី ថ្ងៃទី៦ ខែមិថុនា ឆ្នាំ២០១៦ នៅចំណុចហាង រ៉ូយ៉ាល់ កាសារ លក់គ្រឿងសង្ហារឹម តាមបណ្ដោយមហាវិថីព្រះមុន្នីវង្ស ស្ថិតក្នុងសង្កាត់ បឹងកេងកង១ ខណ្ឌចំកាមន រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលលើតហេតុគេបានឃើញរថយន្ដស៊េរីទំនើបមួយគ្រឿងម៉ាក JAGUAR ពណ៌ខ្មៅ ពាក់ស្លាកលេខ ភ្នំពេញ 2AG-1088 បើកបរដោយនារីជនជាតិចិនម្នាក់ ដោយធ្វើដំណើរតាមបណ្ដោយមហាវិថីព្រះមុន្នីវង្ស ទិសដៅពីត្បូងទៅជើង ពេលមកដល់ចំណុចកើតហេតុរថយន្ដបានរេចង្កូតទៅបុករនាំងដែកពុះចែកទ្រូងផ្លូវពេញទំហឹងបណ្ដាលអឲ្យបាក់អស់ចំនួន៤ផ្ទាំង ចំណែករថយន្ដដាច់កាឡេកង់ខាងមុខផ្នែកខាងឆ្វេងបន្តដំណើរទៅមុខលែងរួច តែមិនបណ្ដាលឲ្យមានអ្នករងរបួសនោះទេ។
ក្រោយពីកើតហេតុគេឃើញមានរថយន្ដស៊េរីទំនើបជាច្រើនគ្រឿងនិងរថយន្ដពាក់ស្លាកលេខ នគរបាល បានមកជួយអន្តរាគមន៍យកនារីជាអ្នកបើកបរចេញពីកន្លែងកើតហេតុបាត់។ ក្រោយមកកម្លាំងសមត្ថកិច្ចជំនាញបានចុះធ្វើការវាស់វែងយករថយន្ដបង្កទៅរក្សាទុកនៅការិយាល័យចរាចរណ៍រាជធានីភ្នំពេញដើម្បីដោះស្រាយតាមផ្លូវច្បាប់៕
ដោយ៖ ជីម ភារ៉ា ដង្កោ
