ភ្នំពេញ ៖ បុរសម្នាក់បានជិះម៉ូតូមួយគ្រឿងយ៉ាងលឿន និងមិនប្រយ័ត្នបានជ្រុលបុករថយន្តកុងតឺន័រកំពុងឈប់លេីចំណីផ្លូវរៀបចំទម្លាក់អីវ៉ាន់ពីក្រោយពេញទំហឹង បណ្ដាលឱ្យផុងខ្លួនជាប់មួយរថយន្តនិងម៉ូតូស្លាប់ភ្លាមៗនៅនិងកន្លែង បង្កការភ្ញាក់ផ្អេីលដល់ប្រជាពលរដ្ឋ និងសាច់ញាតិមកទ្រហោយំសោកស្ដាយជនរងគ្រោះ កាលពីវេលាម៉ោង ៩ និង ២០នាទីយប់ថ្ងៃសុក្រ ទី២០ ខែមករា ឆ្នាំ២០២៣ នៅតាមបណ្ដោយផ្លូវ៣១៧ កែងនិង៥៧២ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
សពជនរងគ្រោះមានឈ្មោះ រ៉េន សំណាង ភេទប្រុស អាយុ ២៦ឆ្នាំ មុខរបរធ្វើសំណង់ ស្នាក់នៅម្ដុំផ្សារទួលសង្កែ ក្នុងសង្កាត់ទួលសង្កែ ខណ្ឌឬស្សីកែវ ។ និងមានស្រុកកំណើត នៅឯស្រុកស្វាយជ្រុំ ខេត្តស្វាយរៀង។
យោងតាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញរថយន្តមួយគ្រឿងម៉ាកហ៊ីយ៉ាន់ដាយ សណ្ដោងទូរកុងតឺន័រ ក្បាលពណ៌ទឹកប្រាក់ ពាក់ផ្លាកលេខភ្នំពេញ3D-5752ធ្វើដំណើរតាមបណ្ដោយផ្លូវ៣១៧ ទិសដៅពីត្បូងទៅជើង លុះមកដល់ចំណុចកើតហេតុ រថយន្តខាងលេីក៏បានឈប់ចតនៅមុខឃ្លាំង ដោយមិនបានដាក់ស្លាកសញ្ញាសម្គាល់ឲ្យបានត្រឹមត្រូវនោះទេ ដោយរង់ចាំកម្មករមកទម្លាក់អីវ៉ាន់ចេញពីទូរកុងតឺន័រចូលឃ្លាំង ។ ខណៈមិនទាន់បានទម្លាក់អីវ៉ាន់ចេញពីទូកុងតឺន័រផង ស្រាប់តែមានបុរសម្នាក់ជិះម៉ូតូមួយគ្រឿងម៉ាកហុងដាឌ្រីមC- 125 ស៊េរីឆ្នាំ 2020 ពណ៌ខ្មៅពាក់ផ្លាកលេខ ស្វាយរៀង1O-5745ធ្វើដំណើរស្របគ្នាមកពីក្រោយយ៉ាងលឿន ជ្រុលទៅបុករថយន្តកុងតឺន័រពីក្រោយពេញទំហឹងបណ្ដាលឲ្យជនរងគ្រោះបោកក្បាលនិងទូកុងតឺន័រស្លាប់ជាប់លើម៉ូតូយ៉ាងអាណោចអាធ៌ម ។
បន្ទាប់ពីទទួលបានព័ត៌មាននេះភ្លាម សាច់ញាតិជនរងគ្រោះបានមកដល់ក៏ស្រែកទ្រហោយំស្ទើសន្លប់បាត់បង់ស្មារតី ដោយបង្កមានការភ្ញាក់ហើយយ៉ាងខ្លាំងផងដែរ ។ ក្រោយមក សមត្ថកិច្ចមូលដ្ឋានបានចុះមកដល់ សហការជាមួយជំនាញចរាចរណ៍ធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នានៅពេលក្រោយ។ដោយឡែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ជូនសាច់ញាតិយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
